Terim Səudiyyə Ərəbistanından ayrılır?
Səudiyyə Ərəbistanı çempionatında mövsüm başa çatdı. Xəbər verdiyimiz kimi Fatih Terimin çalışdırdığı ''Əl-Şabab'' mövsümü qələbə ilə tamamladı. Ər-Riyad təmsilçisi son turda səfərdə ''Əl-Fayha''nı 2 cavabsız qolla məğlub etdi.
Terim komandanı 6-cı pillədə qəbul etmişdi və 6-cı pillədə də təhvil verdi. İndi əsas məsələ ''İmperator''un karyerasını Səudiyyə Ərəbistanında davam etdirib-etdirməyəcəyidi. O, dekabrda 6 aylıq müqaviləyə imza atmışdı və müqavilənin müddəti tamam olmaq üzrədi. Ünlü türkiyəli mütəxəssisin gələcək taleyi hələ də qeyri-müəyyəndi. Terim sonuncu mətbuat konfransında bu mövzuda suala belə cavab verdi:
''Gələn mövsüm üçün bir neçə seçim imkanım var. Karyeramın bu dönəmində, 40 illik təcrübədən və bu qədər titullardan sonra məni yalnız ciddi şəkildə həyəcanlandıra biləcək layihənin içində yer almaq istəyirəm. Ancaq təklifləri nəzərdən keçirərkən, təbii ki, ilk növbədə ''Əl-Şabab'' ilə bir-birimizi dinləyəcəyik''.
Səudiyyə Ərəbistanı mətbuatı Terimin bu sözlərini onun ayrılmaq və başqa ölkədə çalışmaq istəməsi kimi qəbul edib.
Digər xəbərlər
