"...etibarlı itlərim var" - Ramin Musayev finalda "Sabah"a şans tanımadı
Misli premyer-liqasında mövsüm başa çatsa da, avrokuboklara yollanacaq komandaların tam siyahısına aydınlıq gəlməyib. Çünki bizi hələ ölkə kubokunun finalı - "Qarabağ" - "Sabah" matçı gözləyir.
Bilindiyi kimi, "köhlən atlar" "bayquşlar"ı məğlub etsə, "Zirə" Avropa Liqasına, "Turan Tovuz" isə Konfrans Liqasına qatılacaq. Əks halda, "Sabah" Avropa Liqasına yollanacaqsa, "bozqurd" avrokuboklarda çıxış edə bilməyəcək.
Bəs Peşəkar Futbol Liqasının sabiq prezidenti Ramin Musayev belə önəmli matç haqda nə düşünür? O, final oyununu stadionda izləyəcək, yoxsa televiziya qarşısında? Ümumiyyətlə, futbol qurumlarından qarşılaşmanı canlı izləmək üçün xüsusi qonaq kimi dəvət alıbmı?
Ramin bəy "Football-plus.az"ın suallarını belə cavabladı:
"Oyun başqa məqsədlərə qulluq etməsə, şübhəsiz, "Qarabağ" "Sabah"a qalib gələcək. Söhbət mərd oyundan gedirsə, Masazır təmsilçisinin "Qarabağ" qarşısında şansı yoxdu. Dəvətə gəlincə, futbol tez unudulan sahədi. Dəvət almamışam, yəqin ki, etməzlər də. Nə edim, yaxşılar tez unudulur. Gərək insanlar səhər əl-üzünü yuyub güzgüyə baxanda vicdana gəlsin, getdikləri yolu kimin açdığını unutmasın. Düzü, dəvət gözləmirəm. Öz işimlə məşğulam. Qoyunlarım və etibarlı itlərim var. Onlarla zaman keçirirəm".
Xatırladaq ki, "Qarabağ" - "Sabah" matçı mayın 31-də, Mehdi Hüseynzadə adına Sumqayıt şəhər stadionunda keçiriləcək. Start fiti saat 19.00-da çalınacaq.KƏNAN BAHADIR
Digər xəbərlər
