Türkiyə çempionatında 37-ci turun son oyunu bazar ertəsi keçirildi.

Elitadan düşməsi çoxdan rəsmiləşən ''Hatayspor''un ''Fənərbaxça'' ilə oyunda sürpriz edə biləcəyinə az adam inanardı. Özü də Hatay təmsilçisi superliqada çıxış etdiyi 5 mövsüm ərzində heç vaxt ''Fənər''i məğlub edə bilməmişdi. Amma bu komanda elitadan gedərayaq tarixi bir performans ortaya qoyaraq güclü rəqibini ilk dəfə yenməyi bacardı.

Halbuki ilk hissədə heçnə sensasiyadan xəbər vermirdi. Ən-Nəsiri hesabı açmaqla bu mövsüm superliqada 19-cu qolunu vurdu və şəxsi rekordunu yenilədi. Merakeşli forvard buna qədər karyerasında çempionat çərçivəsində heç vaxt bu qədər qol vurmamışdı. Matçın qırılma anı 38-ci dəqiqəyə təsadüf etdi. Mərt Müldür son ümid foluna görə qırmızı vərəqə alaraq komandasını azlıqda qoydu.

Maraqlıdı ki, bu, ''Fənərbaxça''nın cari mövsüm ilk qırmızı vərəqəsi oldu! Fasilə ərəfəsində isə İstanbul nəhəngi daha bir şanssızlıq yaşadı. Massanqanın zərbəsindən sonra top əvvəlcə dirəyə, sonra qapıçı Ərtuğrul Çətinin belinə dəyərək tora daxil oldu. Mourinyo tərəfindən şans qazanan və bu mövsüm superliqada ilk dəfə start heyətində meydana çıxan 22 yaşlı bu qapıçı fasilədən sonra da ''hoqqa verməkdə'' davam etdi.

İkinci hissənin əvvəllərində məhz onun kobud səhvi ikinci qolun buraxılması ilə nəticələndi. Çox keçmədən Şkrinyar penaltiyə səbəbkar oldu və fərq 2 topa yüksəldi. Bu da son olmadı. Pərən-pərən düşən ''Fənər'' 4-cü qolu buraxmağa da ''özündə güc tapdı''. Son anlarda İrfan Can Kahveci yekun nəticəni müəyyənləşdirdi. Beləliklə, 2:4 məğlub olan ''Fənər'' 2023-ün aprelindən bu yana ilk dəfə bir oyuna 4 top buraxdı. Həmin vaxt digər portuqaliyalı Jorje Jezuşun çalışdırdığı komanda evdə ''Beşiktaş''a 2:4 uduzmuşdu.

Daha bir maraqlı fakt odu ki, Türkiyə çempionatı tarixində ilk dəfə bir klub elitanı tərk etdiyi mövsümdə ''Fənərbaxça''ya 4 qol vurdu. Superliqada son 4 oyunda 2-ci dəfə uduzan ''Fənər'' daha öncəki 58 oyunda qeydə alınan məğlubiyyət sayını tekrarladı!