Dünən ölkəmizin futbol yığmasının qarşıdakı iki yoldaşlıq oyunu üçün heyəti açıqlandı. Hamı siyahıya baxıb “kim var, kim yoxdu” deyərkən bir nəfər social şəbəkədə coşdu: “Araz-Naxçıvan”dan 0 futbolçu? Fəlakət”.
Bu sözlərin sahibi Felipe Santosdu. Legioner, həm də milliyə heç bir aidiyyatı olmayan futbolçu. Amma o bunu yazanda özünü yox, komanda yoldaşlarını düşünüb. Onların haqq etdiyini düşündü və dedi. Bəlkə də haqlıdı. Bəlkə də sadəcə, oyundaşlarına sahib çıxmaq istədi. Bəs bu istəyin qarşılığında rəqəmlər nə deyir? 17 oyuna 3 qələbə və Avropa? Qış fasiləsindən sonra “Araz-Naxçıvan” 17 oyunda cəmi 3 qələbə qazanıb. Kağız üzərində zəif statistikadı, bəli. Amma indi gəlin bir az da rəqəmlərin altına baxaq. Komanda 3-cü pillədə qərarlaşıb və tarixində ilk dəfə Avropaya çıxıb. Heyətdən heç olmasa, bir futbolçu milli formanı haqq etməyibmi? Santosun sözlərinin arxasında nə dayanır? Felipe belə yazmaqla bəlkə də “komandaya hörmətsizlik olunub” mesajı vermək istəyir. Bu, onun haqqıdı. Felipe komandasının əziyyətini, Avropaya çıxmaq üçün verdiyi savaşı təqdir edilməyə layiq görür. Amma bir reallıq da var. 17 oyunda 3 qələbə qazanan komanda sabit, milliyə futbolçu göndərəcək qədər “davamlı yaxşı” görünmür. Avropaya çıxmaq böyük işdi, amma milli forma geymək üçün bilet deyil!
ƏSƏD SEYİDOV