Səudiyyə Ərəbistanı çempionatında 33-cü turun oyunları keçirilir.

"Football-plus.az" xəbər verir ki, turun mərkəzi oyununda Fatih Terimin çalışdırdığı ''Əl-Şabab'' yeni çempion ''Əl-İttihad''ı qəbul etdi. Fransalı Loran Blanın çalışdırdığı, eləcə də heyətində Benzema, Kante, Fabinyo, Diabi, Berqveyn kimi ulduzlar olan ''Əl-İttihad'' ötən tur tarixinin 10-cu çempionluğunu qazanmışdı.

Cedda şəhərinin təmsilçisi çempion statusunda keçirdiyi ilk qarşılaşmada da inamlı təsir bağışladı. İlk yarıda qonaqların heyətində Mussa Diabinin dubluna meydan sahiblərində Yannik Ferreyra Karrasko cavab verdi. İkinci hissədə Stiven Berqveyn yeniden fərqi iki topa çatdırdı. ''Əl-Şabab''da Kristian Quanka fərqi minimuma endirsə də, komandanın bundan artığına gücü çatmadı. 3:2 hesabı ilə üstün olan ''Əl-İttihad'' ardıcıl 5-ci qələbəsini qazandı və xalını 80-ə yüksəltdi.

2 oyunluq qələbə seriyası qırılan ''Əl-Şabab'' isə 57 xalla 6-cı pillədədi. Bu, Ər-Riyad təmsilçisinin türkiyəli mütəxəssisin başçılığı altında 22-ci rəsmi oyunda yaşadığı 7-ci məğlubiyyət oldu (11 qələbə, 4 heç-heçə).

Maraqlıdı ki, mövsümün sonuna cəmi 1 tur qalsa da, Terimin komandanın başında qalıb-qalmayacağı hələ də bilinmir. Onun müqavilə müddəti mövsümün sonunda başa çatır.