Səudiyyə Ərəbistanı çempionatında 27-ci turun oyunları keçirilir.

Fatih Terimin çalışdırdığı “Əl-Şabab” doğma fanatları önündə “Əl-Xolud” ilə qarşılaşdı. Oyun meydan sahibləri üçün uğurlu alındı.

12-ci dəqiqədə Kristian Quanka qələbənin əsasını qoydusa, digər qol fasilə ərəfəsində vuruldu. Maraqlıdı ki, qazanılan penalti zamanı “Əl-Şabab”ın iki təcrübəli ismi – belçikalı Yannik Karrasko ilə mərakeşli Abderrazak Hamdalla arasında münaqişə yaşandı. Onların hər biri penaltini vurmaq istəyirdi. Amma komandanın ştatlı penalti vuranı məhz Hamdalladı. Terim də məsələyə qarışaraq penaltini bu futbolçunun vurmasını istədi. 34 yaşlı Hamdalla məşqçinin ümidlərini boşa çıxarmayaraq yekun nəticəni müəyyənləşdirdi (2:0). “İmperator”un komandası çempionatda ardıcıl 3-cü qələbə sayəsində xalını 49-a çatdırdı və 5-ci pillədəki “Əl-Əhli”yə çatdı. Amma “Əl-Əhli” bu turun oyununu dünən keçirməliydi. “Əl-Şabab”ın son 8 rəsmi oyunda yalnız bir məğlubiyyəti var (5 qələbə, 2 heç-heçə). Həmin məğlubiyyət aprelin 1-də ölkə kubokunun yarımfinalında iddialı “ƏI-İttihad” ilə qarşılaşmada qeydə alınıb. Özü də Ər-Riyad təmsilçisi həmin matçda 90-cı dəqiqəyə 2:1 öndə daxil olsa da, 90+2 və 90+9-cu dəqiqələrdə buraxdığı qollarla çox dramatik şəkildə uduzmuşdu.

Terimə “Əl-Xolud” ilə matçın ardından klubdakı gələcəyi ilə bağlı sual ünvanlandı. Çünki 71 yaşlı mütəxəssisin müqavilə müddəti mövsümün sonunda bitəcək. O, bu mövzudakı suala “hələ qərarımı verməmişəm.

Yeni bir xəbər olan kimi sizə açıqlayacam” cavabını verməklə kifayətləndi. Ümumilikdə “Əl-Şabab” bu məşqçi ilə indiyə qədər keçirdiyi 16 rəsmi oyundan 9 qələbə, 2 heç-heçə, 5 məğlubiyyətlə ayrılıb.