“Qarabağ” Varşava “Legiya”sının 29 yaşlı forvardı Mark Qualla maraqlanır. Polşa klubu ispan futbolçu üçün 500 min avro tələb edir. “Transfermarkt”da qiyməti 1,5 milyon avro olan hücumçu da bu keçidə müsbət yanaşır.

Mark Qual kimdi? Belə futbolçunu almağa dəyərmi, dəyməzmi?

Martda 29 yaşını tamamlamış mərkəz hücumçusunun zəngin karyerası var. Qual peşəkar karyerasına “Saraqosa”da başlayıb. Burda 29 oyuna 6 qol vuran futbolçu “Jirona”ya üz tutur və 19 oyunda 4 dəfə rəqib qapısına yol tapır. Sequndada ardıcıl iki mövsüm keçirən futbolçu daha sonra İspaniyanın digər klubu “Alkorkon”da çıxış edir. İki mövsüm bu komandada top qovan hücumçu ümumilikdə 50 oyuna çıxıb və 6 qol vurub.

Beləliklə, Qualın İspaniya karyerası başa çatır. Daha sonra Ukrayna “Dnepr”inin və Polşa “Yagelloniya”sının heyətində görünür. Son iki mövsümdə “Legiya”da müntəzəm oynayan 29 yaşlı hücumçu burda çıxdığı 59 oyunda 16 dəfə qol vurmağı bacarıb.

Onu da qeyd edək ki, 2017-ci ildə İspaniyanın U-21 yığmasında da çıxış edən futbolçu Arrisabalaqa, Rodri, Merino, Asensio, Dias kimi futbolçularla birgə oynayıb. U-21-də üç oyuna çıxıb.

Futbolçunun qol duyumu yüksəkdi, lakin taran tiplidi. Onu “Sabah”ın Pavol Şafrankosuna bənzədə bilərik. “Qarabağ” üçün nə qədər uğurlu ola bilər - bu da başqa mövzudu. “Qarabağ”da uğurlu olan bütün mərkəz hücumçuları atletik, sürətli və özü vəziyyət yarada bilən futbolçulardı. Reynaldodan tutmuş Juninyoya qədər. Düzdü, Ramil Şeydayev nümunəsi də var. Lakin Ramil daha çox cinahda oynayırdı. Musa isə hələ də istəniləni bacarmır.

MÜZƏFFƏR QULUZADƏ