Premyer-liqada çempionatın ikinci yarısında gözləniləndən zəif təsir bağışlayan “Turan Tovuz”un baş məşqçisi Kurban Berdıyev əksər açıqlamalarında zədənin müdafiə xəttində yaratdığı problemləri önə çəkir.

Müdafiəçilərin sıradan çıxması əsas səbəb kimi göstərilsə də, futbol ictimaiyyətində bu yanaşma razılaşmayanlar da çoxdu. Belələrinin fikrincə, əsas problem müdafiəçi çatışmazlığı yox, qış transferlərinin yarıtmazlığı ilə bağlıdı.

“Football-plus.az” xatırladır ki, “Turan Tovuz” qış fasiləsində heyətinə altı yeni futbolçu qatıb. Lakin bu oyunçuların çıxışı nə komandanın hücum potensialını artırdı, nə də ümumi performansa təsir göstərdi. Belə ki, Hayderson Urtado komandaya qoşulandan sonra 13 oyunda meydana çıxıb, 2 dəfə fərqlənib. Jo Batista 7 oyuna çıxıb, 1 qolun müəllifi olub. Kauan Martins 14 oyunda şans qazansa da, onun da göstəricisi 2 qolla məhdudlaşıb.

Yerli transferlərdən Orxan Əliyev 10 matçda forma geysə də, qol hesabını açmayıb. Rəhim Sadıxov 16 oyunda 2 qola imza atıb. Qış transferlərindən ən bərbadı isə Anton Kraçkovskidi. O, sadəcə 5 görüşdə meydana çıxıb və fərqlənməyib.

Bu altı futbolçunun 65 matçlıq iştirakı yalnız 7 qolla nəticələnib. Belə rəqəmlər hücum və yarımmüdafiə xəttində ciddi problemlərin qaldığını, transferlərin isə bu boşluğu doldura bilmədiyini göstərir. Yəni “Turan Tovuz” qış “transfer pəncərəsi”ndə keyfiyyətin yox, kəmiyyətin arxasınca qaçıb. Nəticə isə ortadadı: “Qarabağ” kuboku qazanmasa, əlvida, Avropa!

ƏSƏD SEYİDOV