“İmişli camaatını premyer-liqaya yüksəlmək münasibəti ilə səmimi qəlbdən təbrik edirəm. Şükürlər olsun ki, 19 ildən sonra yenidən elitadayıq. Bu hissin, sevincin, ab-havanın adı yoxdu. Möhtəşəm nəticəyə imza atmaq üçün əziyyət çəkən hər kəsə – futbolçularımıza, məşqçilərimizə, klub rəhbərliyinə, azarkeşlərə – dərin təşəkkürümü bildirirəm. Fanklub 2022-ci ildə fəaliyyətə başlayıb. Əsas məqsəd azarkeş sayını daha da artırmaq və komandamıza daim hər yerdə güclü dəstək verməkdi. Bizim üçün qələbə də, məğlubiyyət də birdi. Nəticələrdən asılı olmayaraq, həmişə “İmişli”nin yanındayıq. Bu, sadəcə, azarkeşlik deyil, ruh və sədaqətdi. Oyunların Bakıda keçirilməsinə gəlincə, bəli, bu xəbər bizi də məyus etdi. Əlbəttə, komandanın doğma stadionda meydana çıxmasını istərdik. Amma reallığı başa düşürük. Bunu hər kəs bilsin: “İmişli” harda oynasa, “Küdrü Qartalları” həmin stadionun tribunalarında olacaq. Komandanı tək qoymayacağıq. İmişlilərin səsi hər oyunda eşidiləcək”.

“Bu adın arxasında həm mənəvi, həm də tarixi-coğrafi dəyər dayanır. “Küdrü” İmişlinin qədim, köklü və qürurverici bölgələrindən biridi. Bu torpaq həmişə igid övladları, zəngin keçmişi və mübarizə ruhu ilə seçilib. Bu adı daşımağın məqsədi yalnız coğrafi mənsubiyyəti göstərmək deyil, həm də bu torpağın ruhunu, tarixini yaşatmaq və ölkə səviyyəsində tanıtmaqdı. Adın əsas dayaqlarından biri də Vətən Müharibəsi dövründə böyük şücaət göstərən “Küdrü Batalyonu”du. Bu batalyon torpaqlarımızın azadlığı uğrunda canından keçən, şəhidlər verən, qəhrəmanlıq səlnaməsi yazan döyüşçülərdən ibarət idi. Onların şücaəti bu adın içində yaşayır. Biz təkcə azarkeşlik etmirik. Həm də bir ideyanı, əxlaqı və mübarizə tarixini daşıyırıq. Adımız, əslində, bu batalyonun xatirəsinə və əbədi qəhrəmanlarına ehtiram duruşudu. “Qartallar” ifadəsi isə xarakterimizi ifadə edir. Bilindiyi kimi, qartal gücün, mübarizənin, ucalığın və azadlığın rəmzidi. Biz də bu ruhla qartal kimi zirvəyə doğru süzür, həmişə qürurumuzu və kimliyimizi qoruyuruq. “Küdrü Qartalları” həm də bir amal, yaddaşdı. Tariximizdən güc alıb gələcəyə uçmağa hazır olan birliyin adıdı”.