Ölkə futbolunun ən gənc simalarından biri “Səbail” 2016-cı ildə qurulub və 2016/17 mövsümündə 1-ci liqada 2-ci yeri tutmaqla elitaya adladı.

“Dənizçilər” elitada ilk mövsümündə bu il olduğu kimi, məhz “Kəpəz”lə ölüm-qalım savaşı apardı. Samir Əliyevin rəhbərliyi altında formalaşan komanda 23 xalla 7-ci yeri tutdu, cəmi 14 xal toplayan gəncəlilər aşağı yuvarlandı. Növbəti mövsüm daha uğurlu oldu. Yalnız “Qarabağ”la “Neftçi”dən geri qalan Aftandil Hacıyevin komandası 3-cü yeri tutdu. Bu isə Avropa Liqasına vəsiqə demək idi. Avrokubokların debütantı “Universitatya Krayova” ilə hər iki oyunda yaxşı təsir bağışlasa da, məhz təcrübəsizliyin qurbanı oldu. Amma 2019/20 mövsümündən etibarən komandanın nəticələrində eniş başladı. “Dənizçilər” həmin mövsüm 7-ci, 2020/21, 2021/22 mövsümlərində sonuncu – 8-ci yeri tutdu. Sadəcə, həmin vaxt liqalararası keçid olmadığından komanda elitada qaldı. 2022/23 mövsümündə “Səbail” həm nəticə, həm də rəhbərlik baxımından dəyişikliklər yaşadı. Şahin Diniyevin rəhbərliyi altında 9-cu yeri tutan Bayıl təmsilçisi “Şamaxı”nı arxada qoydu, ölkə kubokunda isə yarımfinala qədər irəlilədi. 2023/24 mövsümünü nəticə baxımından nisbətən yaxşı qiymətləndirmək olar. 7-ci yeri tutan “dənizçilər” “Araz-Naxçıvan”, “Kəpəz” və “Qəbələ”ni qabaqladı.

2024/25 mövsümündə yaşananları isə hamınız bilirsiz. Mövsüm ərzində üç baş məşqçiyə (Şahin Diniyev, Cavid Hüseynov, Elvin Məmmədov) güvənən komanda sonda premyer-liqanı tərk etməli oldu. Mövsümə Diniyevin rəhbərliyi ilə başlayan “Səbail” ilk 12 oyunda cəmi 2 qələbə, 1 heç-heçə və 9 məğlubiyyətlə zəif performans göstərdi. Bu nəticələrdən sonra Diniyev istefa verdi. Onun yerinə müvəqqəti klubun U-19 komandasının baş məşqçisi Elvin Məmmədov təyin edildi. Premyer-liqanın 13-cü turunda “Səbail” - “Turan Tovuz” matçı 1:1 hesabı ilə bitdi. Ardınca baş məşqçi postuna Cavid Hüseynov gəlsə də, uğursuzluqlar davam etdi. 27-ci turun “Səbail” - “Neftçi” matçından sonra Hüseynov klub rəhbərliyini sərt şəkildə tənqid etdi. Bu tənqidlərdən bir neçə saat sonra o, vəzifəsindən azad olundu. Elvin Məmmədov yenidən baş məşqçi vəzifəsinə gəlsə də, vəziyyəti dəyişə bilmədi...

ƏSƏD SEYİDOV