“Nürnberq”in futbolçusu Mahir Emrelini transfer etmək istəyən klubların sayı artıb.

“Football-plus.az” Türkiyə mətbuatına istinadla xəbər verir ki, qardaş ölkənin superliqasında çıxış edən “Samsunspor” da 27 yaşlı hücumçunu heyətinə qatmaq istəyir. Klub artıq oyunçuyla ilkin təmaslarını həyata keçirib.

Hələ Mahir qarşı tərəfə nə “hə”, nə də “yox” deyib. Böyük ehtimalla, bu izdivac baş tutmayacaq. Ona görə ki, həmyerlimizin Almaniyanın 1-ci bundesliqa klublarından da təklif aldığı bildirilir.

Hücumçu, təbii ki, karyerasını “böyük beşlik” ölkəsinin aparıcı çempionatında davam etdirmək istəyir. Bunu Almaniyanın tanınmış nəşri “Bild” də təsdiqləyir.

Xatırladaq ki, Mahir 2023-cü ilin fevralından iyununa qədər qardaş ölkənin başqa superliqa təmsilçisi “Konyaspor”da icarə əsasında (onda Zaqreb “Dinamo”suna məxsus idi – red.) forma geyib.

KƏNAN BAHADIR