Deyəsən, nəinki Mahir Emrelinin, ümumiyyətlə, Azərbaycan futbol ictimaiyyətinin xəyalları gerçək olmaq üzrədi. Ona görə ki, 2-ci bundesliqada yarışan “Nürnberq”in şərəfini qoruyan həmyerlimizə iki bundesliqa klubundan təklif var! Bunu biz yox, Almaniyanın tanınmış nəşri “Bild” iddia edir.

“Football-plus.az” olaraq, dəfələrlə Mahirə səsləndik, ondan sevimli işinə daha çox vaxt ayırmağı, qollar və məhsuldar ötürmələrlə fərqlənməyi tələb etdik. Axı onun çox böyük potensialından xəbərdarıq! Bəli, 2-ci bundesliqa ölkənin əsas çempionatı deyil. Amma burda yetərincə köklü klublar çıxış edir, stadionlar dolub-daşır, ciddi rəqabət mühiti (10-cu pillədəki “Nürnberq” lider “Köln”dən cəmi 9 xal geridədi) var.

İstənilən halda, “Bild”in xəbərinə şübhə ilə yanaşmaq sadəlövülük olar. Deməli, məqam yetişib. Mahir bir az da dişini sıxıb qollar vurmağa davam etməli, mövsümün sonunda bundesliqa klubuyla anlaşmaq fürsətini maksimum dəyərləndirməlidi. İndi o, karyerasının ən mühüm həftələrini yaşayır, burda səhvə yol versə, çətin ki, bir daha belə yüksəlmək şansı qazana. “Legiya”, “Dinamo” və “Konyaspor” şansları boşa verilib. Daha vaxtdı!

KƏNAN BAHADIR