Xalq qisasçısı, əfsanəvi qəhrəman Qaçaq Nəbinin həyatından, onun apardığı mübarizədən bəhs edən “Qanlı zəmi” filmini hamımız sevə-sevə izləmişik.

Həmin filmin xeyli təsirli səhnəsi var. Onlardan biri də Qaçaq Nəbinin toy səhnəsidi. Həcər xanımla evlənən Nəbi özünə el adəti ilə toy etmək fikrinə düşür. O dövrün adət-ənənəsinə uyğun stol açılır, üzərinə təamlar düzülür. Qara zurnanın səsi ətrafa yayılır. Di gəl ki, kənd camaatı toya gəlmir. Yeməklər soyuyur, masanın ətrafı boş qalır. Uzun müddət gözü yolda salan Nəbi də pərtliyini gizlədə bilmir, ağır mənzərənin təsiri altında toy mağarını tərk edir...

Martın son günlərində Tovuzda şəhər stadionunun əsas korpus binasının açılış mərasimi keçirildi. Mərasimdə AFFA-nın baş katibi Cahangir Fərəcullayev, baş katibin müavini Kamran Vəliyev, Peşəkar Futbol Liqasının texniki idman direktoru Elgiz Abbasov, Futbolun İnkişaf Fondunun icraçı direktoru Tural Piriyev və başqa qonaqlar iştirak edirdi. Hamısı da Bakıdan əyalətə qədər uzanan yolu qət etmiş, özlərinə əziyyət verməkdən çəkinməmişdilər. Ehtiram Quliyevlə birlikdə açılışı bildirən qırmızı lenti kəsən AFFA-nın baş katibi Cahangir Fərəcullayev ürək sözlərini də bildirmişdi.

Sitat:

Qulağa xoş gələn sözlərdi. Üzərindən heç bir ay keçmədi. “Turan Tovuz”un adıyla bağlı daha bir tədbir keçirildi. Yenə də açılış mərasimi idi. Bu dəfə mərasim Tovuzda yox, Bakının Kürdəxanı qəsəbəsində baş tutdu. “Hünər” təlim-məşq bazasının istismara hazır olan təbii örtüklü meydançasının açılış mərasimi keçirildi. Ehtiram Quliyev açılışı bildirən qırmızı lenti kəsərkən onun yanında AFFA rəsmiləri yer almamışdı. Onunla birlikdə lenti millət vəkilləri Arzu Nağıyev və Azər Allahverənov kəsdi.

Mərasimdən çəkilən şəkillərə dəfələrlə göz gəzdirdim. Gözüm AFFA rəsmilərini axtardı. Amma axtarışlarım nəticəsiz qaldı, axtardıqlarımdan heç kimi görə bilmədim. Belə başa düşdüm ki, AFFA rəsmiləri budəfəki tədbirə qatılmayıb. Sözün düzü, xeyli təəccübləndim. Nə baş verib? Cəmi 25 gün əvvəl 450 kilometr yolu qət etməkdən çəkinməyən AFFA rəsmiləri nə üçün bu dəfə Kürdəxanıda, şəhərin mərkəzindən 10 kilometr məsafədə görünmədi. Onlara dəvət göndərilməyib, yoxsa özlərinə əziyyət vermək istəməyiblər?

Belə cavabsız suallar çoxdu. Həmin suallar ətrafında müəyyən mülahizələr yürütmək mümkün olsa da, bunlar elə ehtimal olaraq da qalacaq. Dəqiq cavabı AFFA rəsmiləri ilə “Turan Tovuz”un rəhbərliyi bilir. Onlar da bunu bizə deməzlər. Səbəb nə olur-olsun, görüntü heç də xoş deyil.

Bəli, yazının əvvəlində “Qanlı zəmi” filmini də bu görüntüyə görə xatırladım. Kürdəxanıdakı açılış mərasimi bir növ Qaçaq Nəbinin toyuna bənzədi. Bilmirəm, AFFA-nın bu boykotu Ehtiram Quliyevi Qaçaq Nəbi kimi pərt edib, ya yox. Ümid edək ki, tərəflər arasındakı münasibətlər o qədər də pis deyil. Ona da ümid edirəm ki, AFFA-nın məlum “VAR yoxdusa, ədalətli oyun da yoxdu, hakimlərə güvənmirik” bəyanatına görə yaranmış qəzəbi də soyuyub, onlar qərb təmsilçisini cəzalandırmağa davam etmək fikrində deyillər.

Olanlar olub, keçənlər də keçib. Çünki bu cür intiriqalardan nə AFFA qazanacaq, nə də Azərbaycan futbolu. Bir vaxtlar Sadıq Sadıqovun rəhbərlik etdiyi “Neftçi” daxili çempionatda rəqib tanımırdı, Avropa Liqasının qrup mərhələsinə yüksəlməklə yeni tarix yazmışdı. Amma AFFA-nın daxilindəki qüvvələr, konkret Elxan Məmmədov onlara qəzəbli idi, addımbaşı “Neftçi”yə badalaq vurmağa çalışırdı. “Neftçi”yə taleyüklü oyunlar ərəfəsində badalaq atılırdı, komandanın üzvləri milliyə çağrılmırdı. Elə Araz Abdullayevin “Evertona”a gedən yolu da bu səbəbdən bağlandı. Çox istərdim ki, həmin səhvlər yenidən təkrarlanmasın.

AMAL