“Qarabağ”ın daha bir futbolçusu komandasını dəyişə bilər. Söhbət Kevin Medinadan gedir.

“Football-plus.az”ın məlumatına görə, 32 yaşlı müdafiəçi “Ferentsvaroş”dan təklif alıb. Macarıstan təmsilçisi oyunçunu yay “transfer pəncərəsi” çərçivəsində heyətinə qatmağı planlaşdırır. İş ondadı ki, kolumbiyalı “köhlən atlar”dan ayrılmaq seçiminə isti yanaşmır. Elə Qurban Qurbanov da Medinanın ağdamlıların şərəfini qorumağa davam etməsində maraqlıdı. Bu üzdən qarşı tərəfin ilk təklifinə maddi məsələlər əsas gətirilərək “yox” deyilib.

Macarlar tezliklə daha böyük məbləğ vədiylə çıxış etməli, təcrübəli müdafiəçinin “saqqızını oğurlamağa” cəhd göstərməlidi.

Xatırladaq ki, Medinanın “Qarabağ”la müqaviləsinin müddəti 2027-ci ilin yayında başa çatacaq. O, 2020-ci ildən “köhlən atlar”ın uğurları üçün tər tökür.

KƏNAN BAHADIR