Nadal tennis üçün darıxmır
Dünyanın 5-ci raketkası Novak Cokoviç isveçrəli Rocer Federerlə ispaniyalı Rafael Nadalın tennisdən gedişinin motivasiyasına necə təsir etməsi haqda danışıb:
“Bəlkə də həqiqətən motivasiyam bir qədər aşağı düşüb. Ancaq motivasiyam olmasaydı, burda qalmazdım. Raketkanı bir kənara qoyardım, heç oynamazdım. Hələ də özümdə oynamaq arzusu, yarış ehtirası hiss edirəm. Xüsusən də “Böyük dəbilqə” turnirləri mənə böyük motivasiya verir”.
37 yaşlı serb tennisçi “Böyük dəbilqə” turnirlərinin 24 qat qalibidi, ümumiyyətlə, karyerası ərzində ATP səviyyəli 99 titul qazanıb (fərdi yarışlarda). Ötən il isə Paris Olimpiadasının qalibi olub.
Dünyanın sabiq bir nömrəli raketkası Rafael Nadal da tennis haqda danışıb:
“Həqiqət budu ki, tennis üçün darıxmıram. Ümumiyyətlə, bununla bağlı heç bir darıxmaq hissi yoxdu. Ona görə yox ki, tennisdən yorulmuşam. Qətiyyən belə deyil. Karyeramı xoşbəxt bitirdim. Bacarsaydım, davam etdirərdim, ona görə ki, həyatım boyunca tennis əsas ehtirasım idi. Fiziki cəhətdən çatdırmadığını anlayanda... Bu fəsli bağlamağa çalışırsan və mən də bağladım. Bu qərarı sakit şəraitdə verdim, orqanizmimin bundar artığına qadir olmadığını anladım”.
Xatırladaq ki, Nadal ötən ilin noyabrında karyerasını bitirməyə qərar verib. 38 yaşlı ispaniyalı 22 dəfə “Böyük dəbilqə” turnirlərində qalib gəlib, ikiqat olimpiya çempionudu.
