“Araz-Naxçıvan” Misli premyer-liqasının 32-ci turunda “Səbail”lə heç-heçə etdi - 1:1.

“Footbal-plus.az” xəbər verir ki, Naxçıvan təmsilçisinin baş məşqçisi Elmar Baxşıyev oyunsonrası mətbuat konfransında jurnalistlərin suallarını cavablayıb.

- Bizim üçün ağır oyun alındı. Kubokdan sonra üç gün vaxtımız var idi. Komanda olaraq dörd-beş gündən bir oynadığımıza görə dinamika baxımından çox aşağı səviyyədə oyun göstərdik.

- Komanda qol vurur, lazım olanı edir, amma sonra geri çəkilir. Niyə belə olur?
- Oyunçulara elə tapşırıq olmur ki, geri çəkilsinlər. Futbolçuları da başa düşürük. Həm kubokda, həm çempionatda oynayırdılar. Heyətimiz də geniş deyil. Rotasiyalar edə bilmirik. Futbolçuların göstərdiyi oyunu kiçiltmək istəmirəm. İnanıram ki, daha dinamik, daha sanballı “Araz-Naxçıvan” görəcəyik.

- Demək olar ki, ikinci yer əldən getdi. Dörd oyun, 10 xallıq fərq var “Zirə” ilə. Üçüncü yerin də əldən getməsi kimi həyəcan varmı komandanın üzərində?
- Komanda mövsümboyu əziyyət çəkib. Bura kiminsə gücünə gəlməmişik. Hər şey futbolçuların gücünə, iradəsinə görə olub. Komanda şəklində daha artığını etməliyik ki, hədəfə çataq.

- “Turan Tovuz”un ardıcıl xal itkiləri motivasiyanıza nə dərəcədə təsir edir? Sizi arxayınlaşdırmır?
- Yox, ümumi götürəndə komandanı rəqibə uyğun yox, özümüzdən aslı etməyə çalışırıq.

- Belə demək olar ki, ilk iki dövrədə qazandınız xallar sizi xilas edir. Son 12 oyunda bir qələbəniz var. Bunu necə izah etmək olar?
- Qələbəni də biz qazanmışıq. Qışdan bəri altı zədəli futbolçumuz var. Altısı da əsas heyət üzvüdü. Komanda çalışır. Hər şey özümüzdən aslıdı.

- İlk “altılıq”da ən az qolu “Araz-Naxçıvan” vurub. Sizə qarşı hakimlərin qərəzini görmüşük. Futbolçuların az qol vurmasının səbəbi nədi?
- Elə oyunlar olub ki, 6-7 qol epizodumuz olub. Dəyərləndirmədə axsama var. Komandanın az qol vurması, sadəcə, statistikadı. Daha çox hücumda oluruq.

MÜZƏFFƏR QULUZADƏ