"Araz-Naxçıvan" Misli premyer-liqasının evdə keçirilən 27-ci tur matçında "Şamaxı"yla heç-heçə etdi - 1:1.

"Football-plus.az" xəbər verir ki, "qırmızı-ağlar"ın baş məşqçisi Elmar Baxşıyev oyunsonrası mətbuat konfransında jurnalistlərin suallarını cavabladı.

- Maraqlı, dinamik oyunun şahidi olduq. Oyunu iki hissəyə bölərdim. İlk yarı bizim üstünlüyümüzlə keçdi. İkinci hissədə "Şamaxı" daha çox epizodlar yaratdı. Uda da bilərdik, uduza da. Hər iki komandanın qalib gəlmək şansı var idi. Yaxşı istirahət edib sonuncu dövrəyə hazırlaşacağıq.

- İkinci hissədəki zəif çıxışınızın səbəbi nədi?
- Kuboka görə əlavə iki oyun keçirmişik. Komandada yorğunluq ola bilər. Heyətimiz geniş deyil, zədəli oyunçularımız çoxdu. Rotasiyalar edə bilmirik. Bilirdik ki, bizim üçün hansısa dövrə ağır olacaq. Futbolun içində olan detallardı.

Növbəti matça qədər zədəli oyunçular sıraya dönə biləcək?
- Buna ümid edirik. İstəyərdim ki, bütün futbolçular sərəncamımda olsun. 7 oyunçu zədəli və ya cəzalıdı. Bütün futbolçular qayıdandan sonra daha yaxşı olacağıq.

- "Araz-Naxçıvan"dan milliyə heç kim çağırılmadı. Bu, sizin üçün gözlənilməz oldu?
- Şərh vermək istəmirəm. Seçim millinin baş məşqçisinə aiddi. Amma bizim komandada da yaxşı yerli futbolçular var. Daha çox çalışıb milliyə layiq olduqlarını göstərməlidilər.

- Qara Qarayev milliyə hazırdı?
- Bu matçı çıxmaq şərtilə Qara hər oyunda iştirak edib. 90 dəqiqə eyni tempdə oynamağa gücü çatır. Yaşına görə çağırmırlarsa... Nəyə görə çağırmadıqlarını bilmirəm. Nəinki Qara, heyətimizdə milli səviyyəsində futbolçular var.