Dopinqdə ilişən Mudrik yalan detektoru testindən keçirilib!
Ukrayna nəhəngi ''Şaxtyor''un direktorlar şurasının sədri Sergey Palkin noyabrda dopinq testdə ilişən və o vaxtdan bu yana meydana çıxa bilməyən ''"Çelsi''nin vingeri Mixail Mudrik ilə bağlı açıqlamalar verib.
''Football-plus.az'' xəbər verir ki, London nəhəngi bu futbolçunu 2022/23 mövsümünün qış fasiləsində ''Şaxtyor''dan ''70+30'' milyon avroya transfer etmişdi. Ancaq 24 yaşlı futbolçunun dopinqdən istifadə etdiyi sübuta yetirilsə, Donetsk klubu 30 milyon avroluq bonus paketini ala bilməyəcək. Ona görə də Mudrikin özünü təmizə çıxarması həm də ''Şaxtyor'' üçün önəmlidi. Palkini dinləyək:
''Mudrik indiyə qədər də nələr baş verdiyini və bu hadisənin onun başına necə gəldiyini anlamır. Bu məsələ ilə bağlı heç bir fikri yoxdu. Vəkilləri onun üçün hətta yalan detektoru testi hazırladılar və Mudrik həmin testdən uğurla keçdi. Bu, bir daha göstərir ki, o, dopinqi bilərəkdən qəbul etməyib. Bu, məhkəmədə sübut kimi istifadə olunacaq. Vəkillər yalan detektoru testinin cavablarının məhkəməyə təqdim olunması məsələsi üzərində çalışırlar. Bu transferdən əldə olunan gəlir çətin durumda olan Ukrayna futboluna da fayda verib. Klubumuzun sahibi Rinat Axmetov həm ''Şaxtyor''u, həm də Ukraynanı çox sevən insandı. Rusiya ilə müharibə başladığı vaxtdan bu yana Axmetov ölkə futboluna artıq 315 milyon avro yardım edib''.
Bütün bunlara baxmayaraq maddi durumu çox da ürəkaçan olmayan ''Şaxtyor'' indi də gözünü öz yetirməsi Georgi Sudakovun satışından əldə olunacaq məbləğə dikib. 22 yaşlı futbolçuya ''Napoli'' və ''Brentford'' maraq göstərir. Bu mövsüm 34 rəsmi oyunda 13 qol, 6 məhsuldar ötürməlik performans sərgiləyən Sudakovun transfer dəyəri 32 milyon avro civarındadı.
Digər xəbərlər
