Bilindiyi kimi, “Neftçi” ölkə kubokunun yarımfinal mərhələsinin cavab oyununda “Sabah”ın qonağı olacağı matçla bağlı azarkeşlərə müraciət edib. “Ağ-qaralar” tərəfdarların oyunun keçiriləcəyi “Bank Respublika Arena”ya daşınması üçün ekspress avtobuslar ayırıb. Nəqliyyat vasitələri bu gün saat 18.00-da “Neftçi Arena”dan Masazır istiqamətində hərəkət edəcək.

“Football-plus.az”ın məlumatına görə, klubun niyyətini azarkeşlər sevinc yox, qəzəb hissi ilə qarşılayıb. Onlar “Neftçi”nin rəsmi sosial şəbəkə hesabında paylaşdığı çağırışın rəy bölməsində aşağıdakı fikirləri bildirib.

Məhəmməd Tağıyev: “Siz oyununuzu oynayın və qalib gəlin. Bizim avtobusa ehtiyacımız yoxdu. “Forza Neftçi” var olsun, onlarla birlikdə gələcəyik”.
Tofiq Cəfərov: “Azarkeş özü oyuna gələ bilər. Biz nəticə istəyirik. Meydanda vuruşun və finala çıxın”.
“Neftçi Baku Fan Page”: “Azarkeşlər özləri gələcək. Yetər ki, siz oynayın və qalib gəlin. Biz oyun və qələbə istəyirik. Yenə də bizi düşündüyünüz üçün çox sağ olun”.
Niyazi Cəfərov: “Zirə”dən 4, “Qarabağ”dan 3 qol buraxandan sonra azarkeşlər yadınıza düşüb? “Sabah”dan da iki qol buraxarsız. Azarkeşləri düşünmək belə olmur. Siz oynayın, sizi sevən azarkeşlər hər yerə gedər. İlk növbədə azarkeşlərə hesabat verin. Sonra avtobus ayırın, biletlərin qiymətini endirin”

Maraq üçün qeyd edək ki, “Neftçi”nin ayırdığı ekspres avtobuslarla oyuna gediş-gəliş və bilet pulsuz olacaq.

KƏNAN BAHADIR