Azərbaycan derbisi: hansı komanda daha şanslıdı?
Aslan Kərimov: “Məncə, derbi gözlədiyimiz qədər gərgin keçməyəcək”
“İmarət Tayfa”: “Neftçi”yə rahatlıqla qalib gələcəyik”
Bu gün ölkə futbolunda həm meydanda, həm də meydandan kənarda baş verəcək hadisələr üzündən gündəmi zəbt edəcək daha bir oyunun şahidi olacağıq.
Təbii ki söhbət təməli 1990-cı illərə dayanan Azərbaycan derbisindən, “Qarabağ”la “Neftçi”nin duelindən gedir. Axı bu komandaların qarşılaşmaları daim futbolçular arasında yaşanan dava-dalaş, azarkeşlərin söz, bəzən də yumruq davasıyla bitir. Odu ki, axşam saatlarında gözümüz-qulağımız Tofiq Bəhramov adına Respublika stadionunda olmalıdı. O başqa məsələ ki, arenada yer almaq daha məqsədəuyğun olar!
İndiyə qədər oyun üçün 5 mindən artıq bilet satılıb. Əlbəttə, burda matçın prinsipiallığıyla yanaşı, “Qarabağ”ın azyaşlı azarkeşləri üçün rəngarəng hədiyyə kampaniyası keçirməsinin də rolu var. Ağdam təmsilçisi matçdan əvvəl stadion ərazisində fəaliyyət göstərəcək fanzonada azyaşlı azarkeşlərə boyama kitabları hədiyyə edəcək. Həmçinin, fanzonada üz boyama, qidalanma, əyləncəli fəaliyyətlər və başqa bir sıra hədiyyələr də olacaq. Yeri gəlmişkən, “köhlən atlar”ın rəsmi “feysbuk” səhifəsi vasitəsilə azarkeşlərə səslənən Kadi Borges də hamını stadiona çağırıb. Yəqin ki, “Qarabağ” tərəfdarları sevimli futbolçularının sözünü yerə salmaz.
Meydandankənar vəziyyətlə bağlı gözləntilər öz yerində. Bəs meydanda nələr yaşana bilər? İlk növbədə hər iki komandanın aprelin 23-də ölkə kubokunun yarımfinal mərhələsinin cavab ounları çərçivəsində meydana çıxmalı olduğunu xatırladaq. Yalnız bu amilin oyunun tempinə, dinamikasına mənfi təsir etmək ehtimalı var. İllərdi öyrəşdiyimiz prinsipiallığı da xatırlatmaqda fayda var. Amma indi elə məqamdı ki, məsələnin mənəvi tərəfini bir qədər də qabartmalıyıq. Çünki “Qarabağ” “Neftçi”yə qalib gəlsə, “Zirə” “Sumqayıt”la matçda xal itirsə, ağdamlılar məhz Azərbaycan derbisində qazanılan xallar sayəsində çempionluğu təmin edəcək ki, bu, “ağ-qaralar” üçün çox ciddi mənəvi zərbə olar. Odu ki, bu amilin odun üstünə benzin tökəcəyini düşünsək, yanılmarıq.
Məhz bu məsələlərlə bağlı təcrübəli mütəxəssis Aslan Kərimovun fikirlərini öyrəndik:
“Son 10 ildə “Qarabağ”dan çempionluğu “oğurlayan” məhz Samir Abasovun çalışdırdığı “Neftçi” olub. Amma mənə görə ölkə kubokundakı və premyer-liqadakı durum bu matçın önəmini, kəsərini azaldır. Azərbaycan derbisi haqda çox danışılmasının səbəbi keçmişdən qalan rəqabətdi. Əlbəttə, “Qarabağ” qalib gələcək. Ağdamlıların həm əsas heyəti, həm də ehtiyat oyunçular skamyasında əyləşən futbolçuları rəqiblə müqayisədə qat-qat üstündü. Abdulla Zubir, Leandro Andrade, Yassin Benzya, Marko Yankoviç, Kevin Medina kimi futbolçular meydandadısa, hansısa komandanın “Qarabağ”ı məğlub etmək ehtimalı çox aşağıdı. Amma bu oyunçular oynamasa, komandanın gücü yarıya qədər azalır. Aleksey İsayev, Redon Cica və Emmanuel Addai ilk dəqiqələrdən meydanda olsa, “Neftçi”nin müəyyən qədər şansları ola bilər. Amma “Qarabağ”ın növbəti rəqibinin “Araz-Naxçıvan” olduğunu da unutmamalıyıq. Düzdü, “Qarabağ”ın texniki heyəti bunu etiraf etmir, amma komanda “Araz-Naxçıvan”a qarşı daha aqressiv oynamağa başlayıb və arada rəqabət yaranıb. Komandalar arasında ayrı-seçkilik etmək istəmirəm. Naxçıvanlıların da səhvləri olub. Yenə də sarı, qırmızı vərəqələr, gülməli də olsa, havada uçan planşet... Məncə, “Qarabağ” daha çox “Araz-Naxçıvan”la oyunu gözləyir. Buna görə də “Neftçi” ilə oyuna köklənmək, əsas heyət oyunçularının meydanda olması kimi məqamlar mənim üçün sual altındadı. Yəqin ki, aparıcı futbolçular müəyyən dəqiqələrdə çıxış edəcəklər. Onsuz da “köhlən atlar”ın “ağ-qaralar”a qalib gəlmək şansı həddən artıq çoxdu. O başqa məsələ ki, bu məqamları “Neftçi”yə aid edə bilərik. Axı “Qarabağ” uduzsa da, əvvəl-axır çempion olacaq. “Neftçi” isə ölkə kubokunda uduzmamalıdı. Əks halda, avrokuboklara yollanmaq hədəfi puç olacaq. Buna görə də bakılılar əsas gücünü kubok matçına qoymaq istəyə bilər. Məncə, Azərbaycan derbisi gözlədiyimiz qədər gərgin keçməyəcək”.
Təbii ki, söhbət Azərbaycan derbisindən gedirsə, azarkeşlərə də tribuna verməliyik. Bu dəfə də ənənəmizə sadiq qaldıq. İş ondadı ki, “Forza Neftçi” yenə media ilə ünsiyyətdən qaçdı. “İmarət Tayfa”nın üzvlərindən Elnur Quliyevin fikirləri:
“Qarabağ” çempionatdakı istənilən komandadan azı iki qat güclüdü. “Neftçi”yə rahatlıqla qalib gələcəyik. Növbəti çempionluğa doğru!”
Bu arada hələ də bilet almayan azarkeşlər biletləri “iTicket.az” saytından onlayn şəkildə, oyun günü isə həm də stadionun kassalarından əldə edə bilərlər. Qeyd edək ki, qapılar azarkeşlər üçün start fitindən 120 dəqiqə əvvəl açılacaq.
KƏNAN BAHADIR
Digər xəbərlər
