Türkiyə çempionatının 31-ci turunda ''Fənərbaxça''nı heç də asan olmayan Sivas səfəri gözləyir.

''Football-plus.az'' xəbər verir ki, ''Qalatasaray'' artıq turu qələbə ilə tamamlayıb. Bu dəfə 3 xal qazanmaq növbəsi ''Fənər''indi. Düzdü, ümumi qələbə hesabında İstanbul nəhənginin ''Sivasspor''a qarşı böyük üstünlüyü var. Komandalar indiyə qədər superliqada 37 dəfə üz-üzə gəliblər. ''Sarı-lacivərdlilər''in 21 qələbəsi olduğu halda ''yiğidolar'' 7 qələbəyə sevinib.

Rza Çalımbay ötən ay məşqçi karyerasında 3-cü dəfə sivaslıların başına keçdi. Bu mövsüm elitada qalmaq üçün oynayan bu komanda bu məşqçinin gəlişindən sonra 4 oyuna 2 qələbə, 1 heç-heçə, 1 məğlubiyyətlə 7 xal toplayıb və evdəki hər iki oyundan zəfərlə ayrılıb. Çalımbayın məşqçi karyerası ərzində ''Fənər''ə qarşı oyunlardakı göstəricilərinə də nəzər salmaq yerinə düşər.

Türkiyə çempionatı tarixində ən çox oyuna çıxan baş məşqçi statusunda olan 62 yaşlı mütəxəssis ''Göztəpə'', ''Dənizlispor'', ''Ankaragücü'', ''Çaykur Rizəspor'', ''Beşiktaş'', ''Ankaraspor'', ''Əskişəhərspor'', ''Sivasspor'', ''Mersin İdman Yurdu'', ''Kasımpaşa'', ''Antalyaspor'', ''Trabzonspor'' və ''Konyaspor''un başında ''Fənər''ə qarşı keçirdiyi 46 rəsmi oyunun cəmi 9-dan qələbə, 26-dan isə məğlubiyyətlə ayrılıb.

Maraqlıdı ki, Çalımbay heç vaxt Türkiyədən kənarda çalışmamasına baxmayaraq onların Joze Mourinyo ilə yolları daha öncə bir dəfə kəsişib. Bu hadisə 22 il öncə - 2003-ün fevralında baş verib. 2002/03-də Çalımbayın çalışdırdığı ''Dənizlispor'' Avropada bir sıra sürpriz nəticələr əldə edərək UEFA kubokunda 1/8 finala qədər irəliləmişdi. Məhz bu mərhələdə ''xoruzlar'' Mourinyonun əzəmətli ''Portu''su ilə qarşılaşdı. ''Əjdahalar'' həmin vaxt ciddi problem yaşamadan mərhələni adladılar (səfərdə 2:2, evdə 6:1). Portuqaliya nəhəngi həmin mövsüm UEFA kubokunun, növbəti mövsüm isə Çempionlar Liqasının qalibi oldu.

Göründüyü kimi 22 ildən sonra bu məşqçilərin yolu bu dəfə Türkiyə çempionatında kəsişəcək.