ABŞ turnesində ''Real'' ilə birlikdə yeni mövsümə hazırlığını davam etdirən Arda Gülərlə bağlı az qala hər gün yeni transfer xəbərləri peyda olur.

“Football-plus.az” xəbər verir ki, bu günə qədər ''Real Sosyedad'', ''Bayer-04'', ''Liverpul'', ''Xetafe'', ''Milan'' gənc türkiyəli ulduza maraq göstərmişdisə, onların sırasına ''Nyukasl'' da qoşulub. ''Real''a yaxınlığı ilə bilinən ''Defensa Sentral'' nəşrinin iddiasına görə ''Nyukasl''ın bir rəsmisi Ardaya görə 80 milyon avro təklif edib. Bu məbləğin 60 milyon avrosu nəğd, 20 milyon avrosu bonuslar şəklində nəzərdə tutulub. Yəni başqa sözlə desək, ''sağsağanlar'' ''60+20'' milyon avro təklif ediblər. Amma xəbərdə qeyd olunub ki, ''Real'' hətta bu məbləğə də Ardanı satmaq niyyətində deyil. Çünki Arda həm fanatlar, həm məşqçilər korpusu, həm də rəhbərlik tərəfindən sevilir. Ötən yay ilə müqayisədə fiziki cəhətdən çox güclənən yarımmüdafiəçinin yeni mövsümdə daha çox şans qazanacağı və adından daha çox söz etdirəcəyi gözlənilir.

Xatırladaq ki, Türkiyə yığmasının üzvü ötən mövsüm ''Real''da 12 rəsmi oyunda cəmi 440 dəqiqə meydanda olmasına baxmayaraq aktivinə 6 qol yazmışdı.

ƏLİ