Almaniyanın Helzenkirhen şəhərində ''Şalke-04'' ilə ''Fənərbaxça''nın sabiq ulduzları arasında bir dostluq oyununun keçirilməsinin nəzərdə tutulduğunu xəbər vermişdik.

''Football-plus.az'' bildirir ki, oyun aprelin 12-də ''Sportanlage Ückendörf'' stadionunda baş tutdu.

''Schalcke 04 Traditionsmannschaft'' və ''Fenerbahçe Legends'' adlı komandaların oyununa fanatlar böyük maraq göstərdi. ''Helzenkirhen Fənərbaxçalılar Dərnəyi''nin rəhbəri Kamil Dəmirbilək tərəfindən təşkil olunan və Almaniya ilə Türkiyə arasındakı dostluq münasibətlərinin möhkəmlənməsinə hesablanan matçdan öncə həm hər iki klubun, həm də hər iki ölkənin himnləri səsləndi.

Helzenkirhenlilərin heyətində Olaf Ton, Oliver Rek, Aylton Qonsalveş kimi tanınmışlar forma geydisə, ''sarı-lacivərdlilər''də Bəkir İrtəgün, Erol Bulut, Uğur Boral, Mehmet Yozqatlı, Elvir Boliç, Miroslav Stox, Bülənt Uyğun, Öndər Turacı, Dəniz Barış, Kamal Aslan, Sərkan Balcı, Bruno Alveş, Mərt Nobre kimi sabiqlər meydana çıxdı. Maraqlıdı ki, ''Fənər''in qapısını heç vaxt bu klubda forma geyməyən və xüsusi qonaq qismində dəvət olunan sabiq almaniyalı əlcək sahibi Tim Vize qorudu.

''Fənər''li futbolçuların formalarında Atatürkün şəklinin ve imzasının yer alması diqqət çəkdi. Görüş 2:2-lik bərabərliklə yekunlaşdı. ''Fənər''in qollarını Nobre ilə İlhan Parlak vurdusa, ''Şalke-04''də hər iki qolunu Aylton vurdu. Braziliyalı bu sabiq futbolçu vaxtilə ''Beşiktaş''da da forma geyib.

Matçın ardından sabiq ulduzlar fanatlara imza paylayaraq onlarla şəkil çəkdirdilər.