Almaniyanın Helzenkirhen şəhərində maraqlı bir futbol matçının keçiriləcəyi məlum olub.

''Football-plus.az'' xəbər verir ki, ''Şalke-04'' ilə ''Fənərbaxça''nın əfsanələri üz-üzə gələcək. Oyun aprelin 12-də Helzenkirhen şəhərində yerləşən ''Sportanlage Ückendörf'' stadionunda keçiriləcək və Bakı vaxtı ilə saat 16.30-da başlayacaq. ''Schalke 04 Traditionsmannschaft'' ilə ''Fenerbahçe Legends'' komandalarının oyununda iki klubun tanınmış simaları ilə yanaşı Almaniya ilə DÇ-2014-ün qalibi olmuş futbolçular da çıxış edəcək.

Oyunla bağlı son məlumatlar ''Helzenkirhen Fənərbaxçalılar Dərnəyi''nin rəsmi səhifəsində paylaşılıb. Elə bilet satışını da bu dərnək həyata keçirir. Dərnəyin səhifəsində paylaşılanlara əsasən məlum olub ki, həmin gün ''Fənər''in heyətində Sərkan Özsoy, Erol Bulut, Mehmet Yozqatlı, Elvir Boliç, Miroslav Stox, Əli Bilgin, Öndər Turacı, Dəniz Barış, Kamal Aslan, Sərkan Balcı, Bruno Alveş, Mərt Nobre kimi sabiqlər meydana çıxacaq. Məşqçilər korpusunda Yılmaz Vural ilə Bülənt Uyğun yer alacaq. ''Şalke-04''də hələlik yalnız Olaf Ton, Oliver Rek, Aylton kimi tanınmışların oynayacağı dəqiqdi.

Matçın keçirilməsinin məqsədinə gəlincə, oyun Türkiyə ilə Almaniya arasındakı dostluğun möhkəmləndirilməsi niyyəti ilə keçirilir. Hər halda Türkiyə mətbuatında məhz belə qeyd olunub.