"Zirə" Misli premyer-liqasının 30-cu tur matçında "Neftçi"nin meydanından qalib ayrıldı - 4:2.

"Football-plus.az" xəbər verir ki, "qartallar"ın baş məşqçisi Rəşad Sadıqov oyunsonrası mətbuat konfransında jurnalistlərin suallarını cavabladı.

- Bizim üçün olduqca çətin başladı. Rəqib ilk iki qol epizodundan maksimum faydalanıb ciddi üstünlük yaratdı. Özümüzü toparlayıq qalib gəldik. Sevincliyik. İkinci hissədə çox fəallaşdıq. Olduqca vacib üç xal qazandıq. Uduza da bilərdik.

- Məncə, "Zirə"nin uğurları yetərincə qabardılmır. Sizcə, bunun səbəbi nədi?
- Sosial şəbəkədən uzaqlaşmışam. Dediyinizin doğru olub-olmadığını bilmirəm. Tərifəlayiq olsaq, tərifləyəcəklər. Qabardılmaq üçün qələbə qazanmırıq. Bizi qarşıda bir-birindən vacib oyunlar gözləyir. İndi məni maraqlandıran "Sumqayıt"la oyundu. Futbolçu üçün hər şey fərqli ola bilər. Amma mən növbəti oyunu düşünürəm. "Araz-Naxçıvan"la 6 xallıq fərq hələ hər şeyin həll olunduğunun isbatı deyil. Yenə deyirəm, hələ Konfrans Liqasında yeni mövsümün nə vaxt başlayacağını bilmirəm. Yəqin ki, məndən gözləntilər çoxdu. Bunu anlayışla qarşılayıram.

- Rəşad Sadıqovun görmək istədiyi "Zirə" budu? Yoxsa daha yaxşısı irəlidədi?
- Futbolçu olaraq da, heç vaxt özümdən razı olmamışam. Həmişə daha yaxşısını edə biləcəyimi düşünmüşəm. Bu gün nəyi düz etmədiyimizi, "Neftçi"nin ardıcıl iki qol vurmasının səbəblərini düşünəcəm. "Neftçi" Samir Abasovun təyinatından sonra yaxşı müdafiə olunur. Ümumiyyətlə, rəqib oyuna çox yaxşı köklənmişdi. Mən artıq ən yaxşısını etdiyimi düşünsəm, geriləyəcəyik.

KƏNAN BAHADIR