"Zirə" Misli premyer-liqasının 29-cu turunda "Qarabağ"ın meydanından məğlub ayrıldı - 0:1.

"Football-plus.az" xəbər verir ki, "qartallar"ın baş məşqçisi Rəşad Sadıqov oyunsonrası mətbuat konfransında jurnalistlərin suallarını cavabladı.

- "Qarabağ"ı qələbə münasibətilə təbrik edirəm. Ağır oyun oldu. Rəqib bu gün ən güclü heyətiylə meydana çıxdı. İşimiz çətin idi. Komandam ilk saniyələrdən cəsarətli və ürəkli çıxış etdi. Matç rəqibin üstünlüyü şəraitində keçdi. Daha çox əks-hücumlara bel bağladıq. Artıq beşinci oyundu ki, "Qarabağ" duran topdan bizə qol vurur. Burdan özümüzü məğlub hiss edərək ayrılmırıq. Bərabərliyə layiq idik. Qarşıda 7 bir-birindən vacib oyun var. Növbəti matçlara köklənəcəyik.

- Penaltini qaçıran futbolçunu bağışlamaq olarmı?
- Niyə olmur? Kim qaçırmır? Özüm də qaçırmışam. Bəli, burdan bir xalla ayrılmaq olardı. Lakin yenə deyirəm ki, özümüzü məğlub hiss etmirik.

- "Zirə"də penalti vurmaqda çətinlik çəkən futbolçular var. Bunu ötən mövsüm avrokuboklarda da gördük. Bu problemi necə aradan qaldırmaq olar?
- Qismət çox həlledici anlarda penaltini dəqiq yerinə yetirib. Penaltinin məşqi olmur. Ümumiyyətlə, bu məsələnin üzərində çox dayanmaq istəmirəm.

- Lavalı bu mövsüm meydanda görə biləcəyikmi? Sonuncu transferinizin (martın 8-də transfer edilən Rikardo Martins nəzərdə tutulur - red.) durumu necədi?
- Martins gələcəyə hesablanan transfer idi. İki ay idi yaşıl meydanlardan kənarda qalmışdı. Lavala gəlincə, müalicəsi davam edir.

- Hadisələrin axarı onu göstərir ki, avrokuboklara yollanacaqsız. Heyətiniz yetərlidimi?
- Hələ çempionat başa çatmadan bu haqda danışmaq doğru olmaz. Qarşıda vacib oyunlar var. Heç avrokuboklarda ilk oyunların nə vaxt keçiriləcəyini bilmirəm. İnşallah, vəsiqə qazansaq, bu sualı cavablayaram.

KƏNAN BAHADIR