Dünən ''Beşiktaş''da klubun rəsmi üzvlərinin ilin ilk toplantısı keçirildi.

''Football-plus.az'' xəbər verir ki, toplantı böyük qalmaqal, hətta rüsvayçılıqla yekunlaşdı. Məsələ burasındadı ki, sabiq başqan Hasan Arat da sürpriz şəkildə bu toplantıda iştirak etmək qərarına gəlmişdi.

Məlum olduğu kimi Arat 2023-cü ilin dekabrın 3-də baş tutan seçkilərdə qalib gələrək klubun 35-ci prezidenti seçilmişdi. Amma onun dönəmi çox çətin və qısa alınmışdı. Arat cəmi 361 gün sonra - 2024-cü ilin noyabrın 29-da sürpriz şəkildə istefa verdi. Həmin vaxt onun bu addımı camiədə heç də xoş qarşılanmadı. Bir çoxları Aratı məsuliyyətdən qorxmaqda və çətin vaxtda klubu atıb qaçmaqda günahlandırdı. Amma Aratın həm də səhhəti ilə bağlı problemləri var idi. Arat ayrıldıqdan sonra bir qayda olaraq toplantılara qatılmırdı və açıqlamalar verməkdən çəkinirdi. Amma bu dəfə özünün dediyinə görə o, hər şeyə aydınlıq gətirmək üçün toplantıya qatıldı.

Onun gəlişi ilk andan qalmaqalla müşayiət olunmağa başladı. Sabiq başqanın gəlişi bəzi yönəticilərin xoşuna gəlmədi. ''Beşiktaş'' onu gözlətdirmək qərarına gələrək yalnız 17-ci olaraq söz verdi. Arat öz sırasını sona qədər gözləyərək kürsüyə çıxdı. O, açıqlama verdiyi sırada salondan səslər gəlməyə başladı. Daha sonra isə arxasında dayanan ''divan kurulu'' başqanı Tevfik Yamantürk Arata söz atmağa başladı. Onlar bir-birilərinə ''tərbiyəsiz'' dedikdən sonra təhqirlərə keçdilər. Məhz bu məqamda Yamantürk Arata yaxınlaşaraq onun üzünə zərbə endirdi. Aləm bir-birinə dəydi və daha iki yönətici də sabiq prezidentin üzərinə cumaraq ona yumruq zərbəsi vurdu. Özü də bütün bunlar toplantını çəkən TRT Haber kanalının canlı yayınında baş verdi!

Qalmaqallı görüntülər qısa müddətdə sosial şəbəkələrin əsas müzakirə mövzusu oldu. Bu olay üzündən toplantı yarımçıq dayandırıldı.