Türkiyə kubokunun 1/4 finalında əzəli rəqiblər - ''Fənərbaxça'' ilə ''Qalatasaray'' üz-üzə gəldi.

''Football-plus.az'' xəbər verir ki, ''Fənər'' evdə oynadığından favorit hesab olunurdu. Amma son illərdə Kadıköydə uğurlu nəticələr əldə etməsi ilə diqqət çəkən ''Qalatasaray'' yenə fanatlarını sevindirdi. Derbiyə Osimhen damğa vurdu.

Həmişə olduğu kimi fəal və istəkli oyunu ilə seçilən nigeriyalı forvard ilk yarım saatda biri penaltidən olmaqla iki qol vurdu. Ümidləri doğrultmayan, özünə bənzəməyən, xüsusilə ilk hissədə həddən artıq çox top itkisinə yol verən ''Fənər'' fasilə ərəfəsində Şimanski ilə müzakirələrə səbəb olan bir qol vuraraq fərqi minimuma endirdi. Joze Mourinyonun komandası ikinci hissədə oyununu nisbətən gücləndirsə də, məğlubiyyətdən qurtula bilmədi.

Beləliklə, ''Cim-Bom'' yarımfinala yüksələrək ''Konyaspor''un rəqibi oldu. ''Qalatasaray'' və Okan Burukun əzəli rəqibə qarşı səfər matçlarında uğurlu nəticələri davam edir. ''Sarı-qırmızılar'' Kadıköydə son 7-ci rəsmi oyunda 5-ci qələbəni bayram etdilər (1 heç-heçə, 1 məğlubiyyət)! Halbuki bu seriyaya qədər komanda əzəli rəqibini səfərdə 20 il məğlub edə bilməmişdi. Okan Buruk ''Qalatasaray''ın başında Kadıköydə keçirdiyi 4-cü rəsmi oyunda da məğlubiyyət acısı yaşamadı (3 qələbə, 1 heç-heçə). Bu, klub tarixinin yeni rekord göstəricisidi.

Bundan başqa ''Qalatasaray'' kubok çərçivəsində ''Fənər''lə oyunlarda qələbə sayındakı böyük üstünlüyünü bir qədər də artırmış oldu. ''Aslan'' kubokda ''Fənər''ə qarşı keçirdiyi 28-ci qarşılaşmada 15-ci qələbəsini qazandı (3 məğlubiyyət).