“Məsələ ciddi araşdırılacaq və günahkar cəzalandırılacaq” – Vitali Borisov, yoxsa Rövşən Hüseynli?
Bilindiyi kimi, futzal millimizin qapıçısı Rövşən Hüseynli Avropa çempionatının əsas mərhələsində keçiriləcək İsveç və Xorvatiyaya qarşı oyunlardan əvvəl heyətdən kənarlaşdırılıb.
Son günlər qalmaqalın hansı şəraitdə baş verdiyi haqda bir neçə xəbər tirajlanıb. Bəzi həmkarlarımız qolkiperin kapitan sarğısına yiyələnmək arzusunda olduğu üçün komandadaxili ab-havanı korladığını iddia edir. Onun məşqlərə evdən gəlib-getmək istədiyini, bu üzdən komandanın axşam məşqindən sonra bazaya yollanmaq üçün avtobusa minməkdən imtina etdiyini bildirənlər də var. Hər halda, məsələ bir qədər dolaşıqdı.
Bəs, Azərbaycan Futzal Federasiyasının bu yöndə mövqeyi necədi? Hansısa tədbir görülməsi nəzərdə tutulubmu?
“Football-plus.az”ın suallarını federasiyanın vitse-prezidenti və İcraiyyə Komitəsinin üzvü Mahmud Sadıqov cavabladı:
“Düzü, millinin düşərgəsində olmamışam. Bu üzdən məsələ ilə bağlı ətraflı məlumatım yoxdu. Federasiyanın mətbuat xidmətinin rəhbəri Mahal Məmmədovun mənə verdiyi informasiyaya görə, Rövşənlə yığmamızın baş məşqçisi Vitali Borisov arasında mübahisə yaşanıb. Buna futzalçının komandayla birgə Mərdakanda yerləşən bazaya – “Liv Bona Dea Arena”ya yollanmaması səbəb olub. Çalışdırıcı Rövşənə millinin düşərgəsində olmağın vacibliyini desə də, qapıçı bununla razılaşmayıb və evə getmək istədiyini bildirib. Təbii ki, məsələ ciddi şəkildə araşdırılacaq və günahkar cəzalandırılacaq. Lakin bunun üçün İsveç və Xorvatiyaya qarşı oyunların bitməsini gözləyirik. Vacib matçdan əvvəl komandadaxili ab-havanın pozulmasını istəmədiyimiz üçün hələ ki səssizliyə riayət edirik”.
Xatırladaq ki, Rövşən Hüseynli sosial şəbəkə hesabında paylaşım edərək heç bir intizam qaydasını pozmadığını bildirib.KƏNAN BAHADIR
Digər xəbərlər
