Samorano Mbappenin onun rekordunu yeniləməyə yaxın olması haqda nə dedi?
Kilian Mbappenin ''Real''da ilk mövsümdəcə qol sayı baxımından adını klub tarixinə yazdırmaq üçün yaxşı şansları var.
''Football-plus.az'' xəbər verir ki, fransalı ulduz artıq Madrid nəhəngində 33 qol vurub. O, bu göstərici ilə klub tarixində ilk mövsümdə ən çox qol vuran futbolçuların siyahısında 2-3-cü pillələrdə qərarlaşan Kriştiano Ronaldo (2009-10) ilə Ruud van Nistelrooya (2006/07) çatıb.
Mbappe bu siyahıda yalnız İvan Samoranodan geri qalır. Çilili Samorano ''kral klubu''nda debüt mövsümü olan 1992/93-də 37 qol vurub. Mbappeni onun göstəricisini təkrarlamaqdan 4 qol, yeni rekorddan 5 qol ayırır. ''Real''da 1992-96-cı illərdə top qovmuş və bir ölkə çempionluğu olmaqla 3 titul qazanmış Samorano Mbappenin onun rekordunu yeniləmək ehtimalının olması barədə bunları deyib:
''Özümlə həqiqətən də fəxr edə bilərəm. Çünki Mbappe səviyyəsindəki bir ulduz mənim rekordumu yeniləməyə çalışır. Bu, ən qısa müddətdə, hətta insanların gözlədiyindən də tez baş vura bilər. Çünki bu oğlan hər şeyə qadirdi. Mbappe mənim rekordumu yeniləsə, qətiyyən üzülməyəcəm. Çünki o, əsil ulduzdu. Digər tərəfdən mənim rekordumu hətta Kriştiano Ronaldo, braziliyalı Ronaldo, Benzema və Van Nistelrooy kimi ''əjdahalar'' da yeniləyə bilməyib. Bu, fəxr olunası məqamdı. Futbol tarixində iz buraxmış bu cür oyunçulardan ilk mövsümümdə daha çox qol vurmağım həmişəlik mənim həyatımda xüsusi bir yer tutacaq''.
Digər xəbərlər
