"Persepolis'' uduzdu, Kartal həmkarının əlini sıxmadı!
İsmayıl Kartalın çalışdırdığı ''Persepolis'' İran çempionatının 24-cü turunda ''Şams Azar Qazvin''in qonağı oldu.
Tura 2-ci pillədə daxil olan ''Persepolis'' favorit hesab olunurdu. Çünki ''Şams Azar Qazvin'' alt pillələrdə qərarlaşmışdı və yalnız elitada qalmaq uğrunda mübarizə aparırdı. Amma Tehran təmsilçisi sürpriz məğlubiyyətlə üzləşdi. Qonaqların heyətində türkiyəli forvard Sərdar Dursunun qolu ilk hissə 1:1-lik bərabərliklə yekunlaşdı. Amma ikinci hissənin ortalarında meydan sahibləri 2 qol vuraraq 3:1 önə keçdilər. ''Persepolis'' son anlarda fərqi minimuma endirsə də, məğlubiyyətdən qurtula bilmədi (2:3).
Komanda Kartalın başçılığı altında çempionatda 7-ci oyunda ilk dəfə uduzdu və turnir cədvəlində ''Sepahan''ı özündən irəli buraxaraq 3-cü pilləyə gerilədi. Bir oyun az keçirən lider ''Traktor'' ilə aradakı xal fərqi isə 4-ə yüksəldi. Final fitindən sonra çox əsəbi görünən türkiyəli mütəxəssisin həmkarı Mehdi Rahmatinin əlini sıxmaqdan imtina etməsi diqqət çəkdi. Kartal oyunsonrası mətbuat konfransında bunları dedi:
''Gözlədiyim səviyyəni göstərə bilmədik. Yığma üzvlərimizin çoxu yorğun təsir bağışladı. Həftəiçi zədədən yeni qayıdan və yaxşı məşq edə bilməyən oyunçularımız var idi. ''Persepolis'' meydana hər çıxdıqda savaşmalı və yaxşı oynamağa çalışmalıdı. Çünki biz baxımlı oynayan komandayıq. Bizim hər matçımızda rəqib komandaların ehtiyat zonası hakim üzərində təzyiq qurmağa çalışır. Burda daha öncə görmədiyim şeylər görürəm. Bunlar normal deyil. Düzdü, məğlub olduq və rəqibi təbrik edirəm. Amma hakimin oyunun sürətlənməsinə imkan verməməsini anlamadım''.
