İrana yollanaraq ''Persepolis''in başına keçən İsmayıl Kartal yeni klubu ilə debüt oyununa çıxıb.

''Football-plus.az'' xəbər verir ki, İran çempionatının 18-ci turunda ''Persepolis'' ''Fulad''ın qonağı olub. Təcrübəli mütəxəssis yeni ölkədə ilk rəsmi oyununda qələbə sevinci yaşaya bilməyib. Tehran təmsilçisi səfərdə 78-ci dəqiqəyə qədər öndə olsa da, qələbə hesabını qoruya bilməyib. Beləliklə, ''Persepolis''də Kartal dönəmi 1:1-lik bərabərliklə start götürdü. Son çempion statusunda olan bu komanda 34 xalla 4-cü pillədədi. Lider ''Sepahan'' turu qələbə ilə başa vursa, ''Persepolis''lə xal fərqi 8-ə yüksələcək.

Yeri gəlmişkən, Kartal artıq yeni klubunda ilk transferi də həyata keçirib. O, ''Fənərbaxça''da çalışdığı dönəmdən gözəl tanıdığı Sərdar Dursunu İrana gətirib. İlyarımlıq müqaviləyə imza atan 33 yaşlı forvard son olaraq ''Alanyaspor''un şərəfini qoruyurdu. Dursun Türkiyə çempionatında ümumilikdə keçirdiyi 94 oyuna 49 qol vurub.

Onu da bildirək ki, ''Persepolis''in növbəti rəsmi oyunu ''Fənərbaxça''nın iki sabiq məşqçisinin duelinə səhnə olacaq. Çünki tehranlılar Asiya Çempionlar Liqası çərçivəsində fevralın 4-də Jorje Jezuşun çalışdırdığı ''Əl-Hilal''ın qonağı olacaqlar. Portuqaliyalı Jezuş bilindiyi kimi 2022/23-də ''Fənər''i çalışdırmışdı.

ƏLİ