İngiltərədə çıxış edən türkiyəli futbolçulara daha biri əlavə oluna bilər.

''Football-plus.az'' xəbər verir ki, ''Adana Dəmirspor''un gənc və istedadlı qapıçısı Dəniz Dönməzər premyer-liqa nəhənginin maraq dairəsinə düşüb. 16 yaşlı əlcək sahibi karyerasını ''Çelsi''də davam etdirə bilər.

''Adana Dəmirspor''un öz yetirməsi olan Dəniz Türkiyə çempionatında hələ ötən ilin mayında ''Antalyaspor''la səfər oyununda debüt edib. Həmin vaxt son anlarda Şahruddin Məhəmmədəliyəvi əvəzləyərək oyuna daxil olan Dənizin heç 16 yaşı da tamam olmamışdı. Elə bu mövsümün ilk turunda ''Fənərbaxça'' ilə səfər oyununda ilk dəfə start heyətində meydana çıxarkən də onun hələ 16 yaşı tamam olmamışdı. Aydın məsələ idi ki, bu cür gənc yaşda belə önəmli oyunlarda iştirak edən bir qapıçı mütləq Avropa klublarının diqqətini cəlb edəcək.

Yağız Sabuncuoğlunun xəbərinə görə ''Çelsi''nın qapıçılar üzrə məşqçilərindən bir nümayəndə aprelin 13-də bu qapıçını canlı izləmək üçün İstanbula gələcək. Həmin gün Adana təmsilçisi səfərdə ''Eyüpspor'' ilə qarşılaşacaq. Londondan gələcək qonaqları Dənizin meneceri Murat Ərdoğan qarşılayacaq və onlar birlikdə oyunu tribunadan təqib edəcəklər. Adanalılarla 2026-ya qədər müqaviləsi olan Dənizin bu mövsümkü göstəriciləri ürəkaçan deyil. Çünki ''Adana Dəmirspor'' özü çox bərbad durumdadı və bu komandanın artıq elitanı tərk edəcəyi rəsmiləşib. O, bu mövsüm 15 rəsmi oyunda forma geyib. Bu matçların heç birində qapısını toxunulmaz saxlaya bilməyib və ümumilikdə 36 qol buraxıb. Amma Dəniz bu qədər qol buraxmasına baxmayaraq demək olar, hər oyunda seyvləri və reaksiyası ilə diqqət çəkir.

190 sm boya malik olan Dəniz Dönməzərin transfer dəyəri təxminən 1 milyon avro civarında qiymətləndirilir.

Qeyd edək ki, son iki mövsümdə artıq iki gənc türkiyəli isim İngiltərəyə klublarına transfer olunub. Ötən mövsümün qış fasiləsində Yunus Əmrə Konak ''Sivasspor''dan ''Brentford''a yollandı. Bu mövsümün qış fasiləsində isə gənc müdafiəçi Yasin Özcanın ''Aston Villa''ya keçidi rəsmiləşdi. Amma o, mövsümü Türkiyədə tamamladıqdan sonra yayda İngiltərəyə yollanacaq.

Onu da xatırladaq ki, türkiyəli qapıçı Altay Bayındır da karyerasını İngiltərədə, dəqiq desək, ''Mançester Yunayted''də davam etdirir.