Çempionlar Liqasının 1/8 finalında prinsipial rəqib ''Atletiko''nu oyunsonrası penaltilər seriyasında məğlub edərək yoluna davam edən ''Real''da futbolçulara böyük miqdarda pul mükafatı verilib.
''Football-plus.az'' İspaniya mətbuatına istinadən xəbər verir ki, başqan Florentino Peresin göstərişi ilə hər futbolçunun hesabına 250 min avro köçürülüb!

Həmin matçda meydana çıxan və çıxmayan futbolçular arasında heç bir fərq qoyulmayıb. Türkiyəli Arda Gülər də daxil olmaqla o görüşdə iştirak ərizəsində yer alan hər futbolçu 250 min avro irəli düşüb. Peresin bu addımı sürpriz kimi qiymətləndirilib. Çünki adətən Peres çempionluqlardan başqa hər hansı bir uğur üçün futbolçulara pul mükafatının verilməsini dəstəkləmir.

Hərçənd bəzi mənbələr iddia edir ki, komanda ÇL-in qalibi olsa, sonda bu məbləğ ÇL-də mükafat üçün nəzərdə tutulan məbləğdən çıxıla bilər. Amma digər tərəfdən dünyanın ən varlı klublarından olan ''kral klubu''nun belə bir hərəkətə yol verəcəyi inandırıcı görsənmir.

Xatırladaq ki, Madrid nəhəngi iştirak etdiyi bütün turnirlərdə iddiasını davam etdirir. Komanda bu mövsüm həm La Liqanın, həm ÇL-in, həm də ölkə kubokunun qalibi olacağı təqdirdə tarixində ilk dəfə trebl qazanmış olacaq.