"Hədəfimiz "Baku Sportinq"i məğlub edib mövqeyimizi möhkəmlətməkdi" - "Karvan" hazırdı
Bu gün futbol üzrə ölkə çempionatının 1-ci liqasında mövsümün sonuncu - üçüncü dövrəsinə start veriləcək.
19-cu turun matçlarından biri də Yevlaxda keçiriləcək. Burda 2-ci sırada qərarlaşan "Karvan" 4-cü pillədə yer alan "Baku Sportinq"i sınağa çəkəcək. Qonaqlar güclü rəqibi məğlub etməklə xal fərqini azaltmağa çalışacaq ki, meydan sahibləri də premyer-liqa hədəfinə doğru daha bir addım atmağa çalışacaq.
Ümumiyyətlə, "futbol ili"nin son matçlarında gərginliyin son həddə çatacağı məlumdu. Bəs, yevlaxlılar özünü mübarizəyə hazır hiss edirmi? Elitaya vəsiqəni təmin etmək mümkün olacaqmı?
"Football-plus.az"ın suallarını "Karvan"ın baş məşqçisi Kənan Kərimov cavabladı:
"Bəli, "Baku Sportinq" yetərincə iddialı rəqibdi. Federasiyanın məlum qərarından sonra ilk "üçlük" uğrunda mübarizədə gərginlik artıb. 5-ci, 6-cı pillələrdə qərarlaşan komandalar da xal ehtiyatını artırmağa, yuxarı sıralara can atır. Bu üzdən oyunlara daha ciddi hazırlaşmaq vacibdi. Bugünkü hədəfimiz rəqibi məğlub edib mövqeyimizi möhkəmlətməkdi. Düzdü, fasilədə rəqib tapa bilmədiyimiz üçün yoxlama oyunu keçirə bilmədik. Amma mövsümün qalan matçlarında maksimum nəticə əldə etmək üçün əlimizdən gələni edəcəyik".
Xatırladaq ki, "Karvan" - "Baku Sportinq" oyunu saat 15.30-da başlayacaq.
KƏNAN BAHADIR
