“İmişli” güclü rəqibdi, amma biz də zəif deyilik” – 3-cü yerə can atır
Bu gün futbol üzrə ölkə çempionatının 1-ci liqasında 18-ci tura start veriləcək.
Bu tur keçiriləcək matçlardan biri premyer-liqaya yükəslmək uğrunda mübarizə aparan komandaların sayının artmasına səbəb ola bilər. Söhbət “Baku Sportinq” – “İmişli” oyunundan gedir. Belə ki, paytaxt təmsilçisi ilk “üçlük”də qərarlaşan rəqibdən 6 xal geridədi. Odu ki, meydan sahibləri qalib gəlsə, 3-cü pilləyə doğru inamlı addım atmış olacaq.
Bəs, komanda oyuna hazırdımı? Heyətdə zədəli və ya cəzalı futbolçular varmı?
“Football-plus.az”ın suallarını “Baku Sportinq”in baş məşqçisi Elmar Sultanov cavabladı:
“Öz bazamızda yaxşı hazırlıq keçmişik. Biz bütün oyunlara qalib gəlmək üçün çıxırıq, bu oyun da istisna deyil. “İmişli” güclü rəqibdi, amma biz də zəif deyilik. Təbii ki, hazırda əsas istəyimiz ilk “üçlük”də qərarlaşmaqdı, bunun üçün şans var. Heyətdə zədəli yox, iki cəzalı futbolçumuz var - Orxan Fərəcov və Ruslan Süleymanov. Sadiq azarkeşlərimiz daim bizim yanımızdadılar, əminəmki, bu dəfə də elə olacaq”.
Xatırladaq ki, Binə qəsəbə stadionunda keçiriləcək matç bu gün saat 15.00-da başlayacaq.
KƏNAN BAHADIR
