"Toparlanmaq, ürəklə oynamaq və meydanda can qoymaq lazımdı” - Ozancan Kökçü
“Azarkeşlərimizi sevindirməyi çox istəyirdik. Çünki onlara qələbə borcumuz var idi. Təəssüf ki, yenə də alınmadı və uduzduq”.
"Football-plus.az" xəbər verir ki, bu sözləri millimizin üzvü Ozancan Kökçü Belarusa qarşı keçirilən görüşdən sonra jurnalistlərə açıqlamasında deyib. 26 yaşlı futbolçu 0:2 hesablı məğlubiyyəti belə şərh edib:
“Belarus millisi bizdən elə də üstün oyun göstərmədi. İlk qol qarışıqlıq zamanı vuruldu. Hesabda geri düşdükdən sonra da qol şanslarımız oldu. Təəssüf ki, hesabı bərabərləşdirmək əvəzinə yenə qapımızda qol gördük. Halbuki daha diqqətli olmaq lazım idi".
Kökçü qeyd edib ki, ardıcıl məğlubiyyətlər komandada mənfi atmosfer yaradır:
“Belarusla matça qələbə üçün çıxmışdıq. Son uğursuzluqları unutdurmaq istəyirdik. Təbii ki, yenə də uduzmaq heç kimə xoş deyil. Belədə komanda daxilində atmosfer də ürəkaçan olmur”.
O, DÇ-2026-nın seçmə mərhələsinə qədər vəziyyətin dəyişəcəyinə inanır:
“Təslim olmamalı, sona qədər vuruşmalıyıq. Çünki komanda şəklində bu vəziyyətə düşmüşük və bu vəziyyətdən də birgə çıxmalıyıq. Əlimizdən gələni yox, daha artığını etməliyik. İnanıram ki, bunu bacaracağıq. Bəli, DÇ-2026-nın seçmə mərhələsində rəqiblərimiz bizdən güclüdülər. Toparlanmaq, ürəklə oynamaq və meydanda can qoymaq lazımdı”.
Digər xəbərlər
