Belarus millimizə qarşı keçirdiyi beynəlxalq yoldaşlıq oyununda qalib gəldi - 2:0.

"Football-plus.az" xəbər verir ki, qonaqların baş məşqçisi Karlos Allos oyunsonrası mətbuat konfransında jurnalistlərin suallarını cavabladı.

- Komandamı təbrik edirəm. Yaxşı oynadıq. Birinci hissədə hər iki komanda şanslar əldə etsə də, istifadə edə bilmədi. Oyuna nəzarət bizim əlimizdə idi.

- Tacikistana qarşı matç daha çətin keçdi, yoxsa bizə?
- Fikrimcə, tam fərqli oyunlar idi. Azərbaycan millisi çox yaxşı komandadı. Potensialı çox böyükdü. Bu matçlar fərqli ab-havada keçdi. Məncə, Azərbaycana qarşı oyun daha çətin oldu.

- Ölkəmizdə çıxış edən belaruslu futbolçuları izləyirsizmi? Onlar sizin milliyə namizədlər siyahısında varmı? Nəzərə alaq ki, "Kəpəz"in kapitanı Yeqor Xvalko belarusludu...
- Xvalko bir neçə il əvvəl millimizdə çıxış edirdi. İndi yetərincə oyun şansı qazanmır. Təbii ki, nəinki Azərbaycan, bütün ölkələrdə çıxış edən belaruslu futbolçuları izləyirik.

- Azərbaycan millisinin DÇ-2026-nın seçmə mərhələsində şanslarını necə dəyərləndirirsiz?
- Mənim kifayət qədər işim var. Başqa komandaların işinə qarışmağa vaxtım yoxdu. Azərbaycan millisinə kömək edə biləcəyimi düşünmürəm. İnanıram ki, komandanızın məşqçilər korpusu qələbələr qazanmaq istəyir və bu istiqamətdə çalışacaqlar.

KƏNAN BAHADIR