“İran çempionatının səviyyəsi Türkiyə çempionatından geridə olsa da, fərq o qədər də böyük deyil. Burda daha çox fiziki gücə əsaslanan futbol oynanılır. İlk oyunlarda çox çətin rəqiblərlə qarşılaşmalı olduq. Həm də çempionatın ən yaşlı heyətinə malikik. Amma nə olur-olsun, “Persepolis”ə pozitiv futbol aşılayacağımı və fanatları sevindirəcəyimi dedim. “Persepolis” 40-45 milyon azarkeşi olan çox böyük bir klubdu. Hər ev oyunumuza 70-80 min, derbilərə isə hətta 100 min azarkeş gəlir. Klubun belə coşqulu azarkeş kütləsinə malik olması məni sevindirir. Cəmi iki aydı burdayam. Amma indidən medianın və fanatların rəğbətini qazandığımı söyləyə bilərəm. Çünki oynatdığım futbol onları da məmnun edir. İki ay ərzində bir dəfə də Tehranı gəzməyə çıxmamışam. Köməkçilərimlə birlikdə gecə-gündüz çalışırıq və yalnız oyunları təhlil edirik. Otellə baza arasında gedib-gəlirik. Burda yeganə problem bazada şəraitin yüksək səviyyədə olmamasıdı. Başqan və yönəticilərlə ilk görüşdə bazanın, eləcə də burdakı meydanların ot örtüyünün yetərli səviyyədə olmadığını vurğuladım. Bundan daha yaxşı çalışma şərtlərinə ehtiyac duyduğumuzu dedim. Onlar da iradlarımız qəbul edərək mənimlə razılaşdılar. Sağ olsunlar, yeni bir yer tapdılar və artıq ora köçmüşük.

Bundan başqa, mənə istədiyim şəkildə yeni bir baza tikəcəklərinə dair söz verdilər. Mən də çalışma sistemimə uyğun bir yerin olmasını səbirsizliklə gözləyirəm. Baza çox önəmlidi. Bir futbolçu transfer olunmadan öncə ilk növbədə klubun şəraitinə baxır. Baza klubun aynasıdı. İranda bu mövzuya bir qədər barmaqarası yanaşıldığı üçün bu məsələdə inkişaf yoxdu. Amma mən də onlara bu mövzuda əlimdən gələn qədər yardım edəcəyimi dedim. Bu, dərin məsələdi və başqa detallara girmək istəmirəm. Belə şeylərlə rəhbərlik məşğul olur. Mən isə əsasən futbolçuların hazırlığına, motivasiyasına cavabdehlik daşıyıram. Onlara daha gigiyenik və modern bir çalışma şəraiti yaratmalıyam ki, potensiallarından maksimum şəkildə yararlana bilim. Yeni bir yerə köçəndən sonra komandanın kapitanları və təcrübəli oyunçuları yanıma gələrək mənə minnətdarlıq etdilər. Bu günə qədər heç bir məşqçinin bunu etmədiyini, amma mənim qısa müddətdə buna nail olduğumu söylədilər”.