Cəmi 14 sarı vərəqənin qeydə alındığı 25-ci turun ardından hesabat turuna “səliqəli” təyinini yapışdırmağa dilimiz gəlmir. Axı hakimlər 18 futbolçuya sarı vərəqə göstərməklə yanaşı, üçünü də meydandan qovdu. Birbaşa “qırmızı” ilə!

Kamal Umudlu tura sözün pis mənasında damğa vurdu. Onun “Araz-Naxçıvan” – “Qarabağ” oyununun sonunda yaşanan qalmaqalı düzgün qiymətləndirə bilməməsi ilə yanaşı, ölkənin ən bacarıqlı hakimi sayılan Əliyar Ağayevin hadisələrin axarına müdaxilə etməməsi də ən azı təəccüb doğurdu.

Araz-Naxçıvan – Qarabağ, KAMAL UMUDLU
3-cü pilləni əldən vermək üzrə olan “Araz-Naxçıvan”la turdan-tura çempionluğa yaxınlaşan “Qarabağ”ın dueli qonaqların aşkar üstünlüyü şəraitində keçdi. O başqa məsələ ki, “köhlən atlar” bunu nəticədə əks etdirməkdə çətinliklə üzləşdi. Hər halda, məlum hadisəyə qədər komandaların intizamlı oyunla yadda qaldığına şübhə yoxdu. 81-ci dəqiqədə yaşananlardan isə xəbərdarsız. Təbii ki, Felipe Santosun qırmızı vərəqə görməsində qəbahət yoxdu. Lakin Kamal Umudlu təhrikçi Yassin Benzyanı, Santosu boğmağa çalışan Elvin Cəfərquliyevi, döymək istəyən Musa Qurbanlını haqq etdiyi kimi cəzalandırmadı. Eləcə də VAR-da əyləşən Əliyar Ağayevdən səs çıxmadı. Üstəlik Frank de Blekere də epizodu şərh etmədi. Məsələ yalnız AFFA İntizam Komitəsi səviyyəsində dəyərləndirildi. Hər halda, belə idarəçilik Kamal Umudlu üçün böyük ayıbdı. Elmar Baxşıyev demişkən, acizlikdi!

Şamaxı – Sabah, CAVİD CƏLİLOV
Şamaxıdakı qarşılaşma yetərincə sakit məcrada keçdi. Bu isə Cavid Cəlilovla köməkçilərinin işini xeyli asanlaşdırdı. Nə “Şamaxı”, nə də “Sabah” aqressiv oyuna həvəs göstərdi. Belədə görüşün “ipini” əldə saxlamaq da xeyli asan oldu. Heç də təsadüfi deyil ki, Cəlilov cəmi iki dəfə əlini cibinə atdı. Hər iki “sarı” da 2-ci hissəyə təsadüf etdi. Belədə hakimlər briqadasının işi haqda mənfi nəsə söyləmək mümkün deyil. Diqqəti çəkəm yeganə məqam ikinci hissəyə 7 dəqiqə artırılması oldu. Həqiqətən də bu qədər uzun vaxta ehtiyac yox idi.

Sumqayıt – Kəpəz, İNQİLAB MƏMMƏDOV
Oyun hər iki komandanın, xüsusilə də qonaqların aqressiv üslubu ilə yadda qaldı. İlk hissədə qayda pozuntularına yol verməkdən çəkinən rəqiblər qalan vaxtda özünə oxşamadı. Hesabda iki top fərqiylə geri düşən Gəncə təmsilçisi biabırçı şəkildə məğlub olmaqdansa, kobudluğa üstünlük verdi ki, ədalət təmsilçisi bunu bağışlamadı. Belədə sarı vərəqələr sıralandı. Təbii ki, burda hansısa yanlış qərardan və ya haqsızlıqdan söhbət getmir. Axı İnqilab Məmmədovdan narazı qalan olmadı. Elə biz də referinin hansısa səhvindən bəhs edə bilmərik.

Zirə - Səbail, TURAL QURBANOV
Avrokuboklara vəsiqə və elitada qalmaq uğrunda mübarizə aparan komandaların görüşü Tural Qurbanovun briqadasına tapşırılmışdı. Hakimin hansısa qərəzli qərarının şahidi olmadıq. Hər iki hissədə aqressiv oyun tərzinə şərait yaradan referi komandaları cəzalandırmamaq üçün əlindən gələni etdi. O, yalnız Suleyman Alluşun kobudluğuna göz yummadı ki, burda da haqlı idi. Çünki “Səbail”in futbolçusu 74-cü dəqiqədə Qomisin çənəsinə zərbə endirərək, “qırmızı” aldı. Ümumi iş baxımından Qurbanova “5” düşür.

Neftçi - Turan Tovuz, RƏVAN HƏMZƏZADƏ
Komandaların gərgin mübarizəsi çoxlu qayda pozuntusuyla müşayiət olundu. Belədə şəkili referi sarı vərəqələrlə futbolçulara yerini göstərməkdən çəkinmədi. 18-ci dəqiqədə Rəhim Sadıxovdan ötürmə alan Emmanuel Hakman Filip Ozobiçlə mübarizədə kobudluq etdi. Hakim dərhal qonaqların legionerinə “qırmızı” göstərdi. O başqa məsələ ki, Hakmanın belə aşırı kobudluğuna ehiyac yox idi.