Yalnız intizam sanksiyaları əsasında mühakimə etsək, onda 23-cü tur o qədər də səliqəsiz olmadı. Əlbəttə, 5 oyuna iki qırmızı (özü də hər biri birbaşa göstərildi) yaxşı hal deyil. Ancaq cəmi 13 sarı vərəqənin qeydə alınmasını, “Kəpəz”in heç cəzalanmamasını xoşagələn hal kimi qəbul edə bilərik.

Hə, başqa bir önəmli məqam da var. İdarəçilikdən narazı qalmaq növbəsi bu dəfə Elmar Baxşıyevə çatdı. “Araz-Naxçıvan”ın çalışdırıcısı İqor Riberyronun meydandan qovulduğu epizodun nəinki qırmızı, heç sarı vərəqəyə da layiq olmadığını dedi. Hətta hakimlərə, yoxsa başqalarına ünvanlandığı bilinməyən mesaj da verdi:

Neftçi – Qarabağ, RƏVAN HƏMZƏZADƏ
Söhbət Azərbaycan derbisindən gedirsə, stadiondakı hər kəsin məsuliyyəti birəbeş artır. Nəinki belə ağır oyunda ədaləti təmsil edəsən, matçın tempi azmış kimi, 10 minə yaxın azarkeşin təzyiqi altında olasan. Böyük ehtimalla, şəkili referinin səhvlərə yol verməsinə elə bu amillər səbəb oldu. Ağadadaş Salyanskini kobud müdaxiləylə yerə sərən Kevin Medinaya əvvəl “sarı” göstərən hakim VAR-dan gələn mesajdan sonra epizodu incələdi və qərarını dəyişib kolumbiyalını meydandan qovdu. Hakim növbəti vacib epizodda da ciddi səhvlə yadda qaldı. Yuri Matiasın cərimə meydançasına daxil olan Kadini yıxmasına “göz yuman” referi bu dəfə də VAR-ın yardımıyla epizodu götür-qoy edib “nöqtə”ni göstərdi. “Neftçi”nin iki, “Qarabağ”ın dörd futbolçusuna verilən sarı vərəqələr isə haqlı cəza idi. Axı istənilən halda oyunçular kobudluq etməməli, hakimlə davranış qaydalarını pozmamalıdı.

Səbail – Sabah, RƏŞAD ƏHMƏDOV
Yəqin ki, Bayıldakı oyunu izləyən hər kəs bu fikirlə razılaşar: matç ərzində təkcə komandalar yox, elə hakim də tamaşaçıların əsəbləriylə oynadı. Tez-tez qayda pozuntusuna yol verən, fasilələrin yaranmasına səbəb olan futbolçuların əndazəni aşmasında “fit sahibi”nin rolunu danmaq olmaz. Əhmədov gah kiçik səhvləri bağışlamadı, gah da futbol adına layiq olmayan davranışları görməzdən gəldi. Bu yöndə xüsusilə İqor Noqeyranın 60-cı dəqiqədə Fərid Nəbiyevin üstünə dırmaşdığı anı qeyd etməliyik. O başqa məsələ ki, həmin epizod üzündən ciddi etiraz edən, az qala “cahana sığmayan” Cavid Hüseynov xal qazanandan sonra Əhmədovu təriflədi. Hər halda, “fit sahibi” bu idarəçiliyə görə tərif yox, tənqid eşitməlidi. Özü də yağlısından... Azı ona görə ki, oyun ərzində üçdən daha çox rəsmi xəbərdarlıq lazım idi. Paytaxt derbisini korlamaq olmaz, Əhmədov!

Sumqayıt – Zirə, KAMAL UMUDLU
Qüvvələrin qeyri-bərabər göründüyü qarşılaşmada hakimlər briqadasının işi elə də çətin olmadı. Rafael Utziqin 2-ci dəqiqədə vurduğu qol zamanı verilən oyundan kənar vəziyyət qərarı doğru idi. Kamal Umudlunun qəbul etdiyi başqa qərarlar kimi bu da heç bir mübahisə doğurmadı. Futbolçuların sərt oyuna meyl etməməsi, kobud oynamaması hakimlərin də işini asanlaşdırmışdı. Heç də təsadüfi deyil ki, Umudlu oyun ərzində cəmi iki dəfə əlini cibinə atdı. Həmin vərəqələrin də rəngi sarı idi. Ümumilikdə hakimlər biriqadasının işini yaxşı qiymətləndirə bilərik.

Turan Tovuz - Araz-Naxçıvan, ƏLİYAR AĞAYEV 
Ötən tur “Turan Tovuz”un mövsüm ərzində hakim səhvlərinə görə xallardan məhrum olması ilə bağlı video paylaşdığını xəbər vermişdik. Matç təcrübəli FİFA referisi Əliyar Ağayevə tapşırılmışdı. Tovuzlu azarkeşlər elə ilk dəqiqədə ümumilikdə idarəçiliyə etiraz əlaməti kimi kürəyini meydana çevirdi. Amma bu oyunda Əliyar bəyin nəticəyə təsir edən səhvi olmadı. “Araz-Naxçıvan” qarşılaşmanın 47-ci dəqiqəsində azlıqda qaldı. Daha dəqiq desək, İssuf Paronun geriyə doğru ötürməsi səliqəsiz alındı. Topu ələ keçirmək üçün irəliləyən Aleks Souzanı İqor Ribeyro yerdə qoydu. Referi epizodu “rəqibi aşkar qol imkanından məhrum etmək” kimi qiymətləndirib, İqoru meydandan qovdu.

Kəpəz - Şamaxı, ELÇİN MƏSİYEV 
Autsayderlərin duelində qalib müəyyənləşmədi. Qarşılıqlı hücumlar şəraitində keçən matçda yalnız “Şamaxı”nın bir futbolçusu – Brahim Konate “sarı” ilə üzləşdi. Elçin Məsiyevin başçılıq etdiyi hakimlər briqadasının nəticəyə təsir edən səhvi olmadı. Referi qarşılaşmanı qənaətbəxş idarə etdi.