Cəmi 16 sarı vərəqənin göstərildiyi, heç kimin meydandan qovulmadığı, “Sumqayıt”la “Səbail”in intizam sanksiyasına məruz qalmadığı turun səliqəli keçdiyini iddia etmək üçün əlimizdə hər cür əsas var.

"Football-plus.az" xəbər verir ki, yalnız bir oyun ciddi narazılıq doğurdu. Söhbət “Sabah” – “Turan Tovuz” qarşılaşmasından gedir. Bakılıların qələbə topunu vurduğu qolun əvvəlində meydanın onlara aid hissəsində Amin Seydiyev Rəhim Sadıxova qarşı kobudluq etdi, hakim bu anı gözdən qaçırdı, autdan oyundd daxil edilən top məhsuldar hücuma səbəb oldu. Hakimlər Komitəsinin sədri Frank De Blekere oyundan sonra “VAR baş vermiş və hakim tərəfindən qeyd edilməyən qayda pozuntusuna müdaxilə edə bilməz” deməklə məsuliyyəti İnqilab Məmmədovun boynuna qoydu.

Şamaxı – Sumqayıt, RƏVAN HƏMZƏZADƏ
Bu komandaların çətin günlərdən keçməsi Şamaxıda gərgin oyun izləyəcəyimizdən xəbər verirdi. Belə də oldu. Qonaqların 1-ci, meydan sahiblərinin 2-ci hissədə üstün çıxış etməsi “şirlər”in qələbəsiylə nəticələndi. Və bu dəfə də şamaxılı azarkeşlər hakimi rahat buraxmadı. İş orasındadı ki, xeyli epizoda görə onlara haqq vermək olar. Axı Həmzəzadə “gənclik şəhəri”nin təmsilçisinin xüsusilə 2-ci yarıda kobud oyun tərzinə, demək olar ki, müdaxilə etmədi. O, yalnız “Şamaxı”nın futbolçularını cəzalandırdı. Meydan sahibləri qələbə qazanmasaydı, Rəvan bəy ciddi qınağa məruz qalacaqdı.

Zirə - Neftçi, ƏLİYAR AĞAYEV
Bu prinsipial oyunu məhz FİFA referisi diarə etməliydi. Özü də qüsursuz. Ağayev əvvəldən axıra qədər bunu bacarmaq üçün əlindən gələni əsirgəmədi. O başqa məsələ ki, komandalar da referiyə kömək etdi. Ağayev rəqiblərə ümumilikdə üç sarı vərəqə göstərdi. Tələbkar baş məşqçilərdən sayılan Rəşad Sadıqovla Samir Abasov oyundan sonra idarəçiliyə toxunmadı.

Qarabağ – Səbail, ELÇİN MƏSİYEV
Liderlə autsayderin oyununda ilk 76 dəqiqə komandaların əzmkar oyunuyla müşayiət olunsa da, “Qarabağ” qalan vaxtda “at oynatdı”. Düzü, Elçin bəy bu matçda o qədər də yorulmadı. Oyun ərzində cəmi bir dəfə əlini cibinə salıb Marko Yankoviçə “sarı” göstərən Məsiyev həm bu, həm də “Səbail”in qapısına təyin etdiyi penalti zamanı səhvə yol vermədi. Nə cərimə meydançası daxilində Leandro Andradeni yerə sərən İlkin Muradovu bağışlamaq olardı, nə də Gitay Sofiri kobud müdaxiləylə yıxan Yankoviçi.

Sabah – Turan Tovuz, İNQİLAB MƏMMƏDOV
İnqilab bəyin qərarları oyunboyu qonaqları özünnən çıxardı. Hər komandanın bir qolu sayılmadı. 29-cu dəqiqədə Joarlem Batista topu tora qovuşdursa da, VAR onun sevincini gözündə qoydu. “Sabah”ın vurduğu 3-cü qol isə İvan Lepinitsanın qayda pozuntusu üzündən sayılmadı. Cesse Sekidikanın 61-ci dəqiqədə vurduğu qolu müşayiət edən, De Blekerenin günahı hakimin boynuna yıxdığı epizoda girişdə toxunduq. İş o yerə çatdı ki, adətən, təmkinli görünən Kurban Berdıyev oyundan sonra “mən nəsə deyəcəm və vəziyyət dəyişəcəksə, bu başqa məsələ, yox, dəyişməyəcəksə, danışmağın nə mənası var?” dedi. “Turan Tovuz” isə komandanın mövsüm ərzində hakim səvlərinə görə xallardan məhrum olması ilə bağlı video paylaşdı. İnsafən, bu oyunun idarəçiliyi aşağı səviyyədə idi.

Araz-Naxçıvan – Kəpəz, KAMAL UMUDLU
Qarşılıqlı hücumlar şəraitində keçən oyunda “Araz-Naxçıvan”ın 1, “Kəpəz”in 3 futbolçusu “sarı” ilə üzləşdi. Azər Bağırov da texniki zona qaydalarını pozduğuna görə sarı vərəqə aldı. Kamal Umudlunun başçılıq etdiyi hakimlər briqadasının nəticəyə təsir edən səhvi olmadı. Ümumiyyətlə, referi qarşılaşmanı qənaətbəxş idarə etdi. Hakimin çiynindəki “yük” də yüngül oldu. Kamal bəyin qərarları və mövqe seçimi doğru idi.