Fevralın 6-7-də keçirilən oyunlarla futbol üzrə ölkə çempionatının 1-ci liqasında 13-cü turu geridə qoyduq.

Bu dəfə nəticələrin əksəriyyəti sürpriz sayılmır. Amma bəzi komandaların qışdan sonra daha iddialı çıxışla yadda qaldığını desək, yanılmarıq. Bunlardan birincisi MOİK-di ki, “hərbçilər” ardıcıl ikinci qələbəylə ilk “dördlüy”ə yüksəlməyi bacardı. Ordu klubunun meydanından məğlub ayrılan “Cəbrayıl”ın enişi isə davam edir. Qarabağ təmsilçisi ortabablar sırasından sürətlə uzaqlaşır. O başqa məsələ ki, özünə gəlməkdə çətinlik çəkən yalnız cəbrayıllılar deyil. Turun mərkəzi oyununda “İmişli”yə uduzan “Karvan”, deyəsən, ənənəvi formasından uzaq düşüb. Ya da Fərid Namazovun komandası gözünü 2-ci pilləyə dikib və bunun üçün əlindən gələni əsirgəmir. Komandanın istəkli çıxışıyla stadiona cəmi 500 azarkeşin gəlməsi, təbii ki, bir-biriylə uzlaşmır.

Görünür, “Qəbələ” də tam özü deyil. Yox-yox, “qırmızı-qaralar” həm qələbə qazandı, həm də qol buraxmadı. Sadəcə, liderin autsayder “Difai” üzərində çətin qələbə qazanması gözdən qaçmadı. Yeri gəlmişkən, Şamaxıda keçirilən oyunu izləyənlər arasında yığmanın baş məşqçisi Fernando Santuş da var idi. Dünən keçirilən oyunlarda qalib müəyyənləşmədi. “Doğma divarlar” arasında meydana çıxan “Baku Sportinq” “Zaqatala” ilə qarşılaşmada qolsuz “sülh”ə razılaşdı. Qonaqlar isə 4-cü yeri MOİK-ə təhvil verməli oldu. “Mingəçevir” Füzuli Məmmədovun baş məşqçi postuna gəlişindən sonra ilk xalını qazandı. “Nur şəhəri”nin təmsilçisi buna “Qaradağ Lökbatan”la heç-heçə etməklə nail oldu. O başqa məsələ ki, Gülağa Əsədov penaltini dəqiq yerinə yetirsəydi, hər şey başqa cür ola bilərdi.

1. Qəbələ 13 10 3 0 22-0 33
2. Karvan 13 8 2 3 30-17 26
3. İmişli 13 7 3 3 24-11 24
4. MOİK 13 6 2 5 19-21 20
5. Zaqatala 13 5 5 3 19-17 20
6. Baku Sportinq 13 4 3 6 10-17 15
7. Cəbrayıl 13 4 2 7 12-14 14
8. Qaradağ Lökbatan 13 3 3 7 14-25 12
9. Difai 13 2 3 8 16-28 9
10. Mingəçevir 13 1 4 8 11-27 7

Bombardirlər: Bəhruz Teymurov, Emil Qasımov (hər ikisi “Karvan”) – 9, Seyxan Fərəcov (İmişli) – 7.

Növbəti turun oyunları fevralın 13-14-ü keçiriləcək: Mingəçevir – Cəbrayıl, İmişli – Qəbələ, Karvan – MOİK, Baku Sportinq – Qaradağ Lökbatan, Zaqatala – Difai.

KƏNAN BAHADIR