Mourinyonun penalti lənəti var imiş
Məlum olduğu kimi ''Fənərbaxça''nın bu mövsüm avrokubok macərası şanssız şəkildə başa çatdı.
İstanbul nəhəngi Avropa Liqasının 1/8 finalında evdə ''Reyncers''ə 1:3 uduzduqdan sonra səfərdə 2:0 qalib gəldi. Amma komanda penaltilər seriyasında uduzaraq mübarizəni dayandırmalı oldu. Tadiç, Fred və Mərt Hakan Yandaş zərbələri qola çevirə bilmədilər.
Bu arada ''Fənərbaxça''nın baş məşqçisi Joze Mourinyonun ciddi bir penalti sindromu olduğu üzə çıxıb. Sən demə ünlü portuqaliyalı mütəxəssis 25 illik məşqçi karyerasında 12 dəfə penaltilər seriyasında iştirak etməli olub və onun komandaları bunların 10-dan (!) məğlub ayrılıb. Onun iki qələbəsindən biri 2008-də İtaliya superkuboku uğrunda görüşdə ''İnter''in başında ''Roma''ya qarşı, digəri isə 2020-də İngiltərə liqa kubokunun 1/8 finalında ''Tottenhem''in başında ''Çelsi''yə qarşı əldə olunub.
Mourinyo hər nə qədər futbol tarixinin ən uğurlu məşqçilərindən sayılsa da, həqiqətən də penaltilər seriyası üzündən bir çox önəmli titullardan məhrum olub. Mourinyonun bu lənəti hələ 2005-in oktyabrında başlayıb. Həmin vaxt onun əzəmətli ''Çelsi''si liqa kubokunda penaltilər seriyasında ''Çarlton''a boyun əymişdi. Bu uğursuzluq daha sonra iki dəfə ''Bavariya''ya qarşı da yaşandı. 2011/12-də ÇL-in yarımfinalında ''Real''ın və 2013-də Avropa superkuboku uğrunda oyunda ''Çelsi''nin başında. 62 yaşlı mütəxəssis illər öncə penalti şanssızlığı ilə bağlı verdiyi açıqlamada bunları demişdi:
''Hər şeyi sınaqdan keçirdim. Hətta idman psixoloqları ilə də çalışdım. Səhnə qorxusu yaşamayan futbolçuları seçməyə çalışdım və yenə də işə yaramadı. ''Real''da işlədiyim dönəmdə ÇL-in yarımfinalında öz meydanımızda ''Bavariya''ya penaltilər seriyasında uduzduq. Təsəvvür edin, əvvəlcə Ronaldo, sonra Kaka, sonda da Ramos penaltini qaçırdı. 2007-də ''Çelsi''də işlədiyim dönəmdə az qala 3 ay penaltilər seriyasının üzərində çalışdıq. Amma ÇL-in yarımfinalında ''Liverpul''a penaltilər seriyasında uduzduq. Həmin vaxt bizim komandada Jeremi Ncitap var idi. Penalti vurmaq üzrə mütəxəssis idi. Səhv etmirəmsə, həmin ana qədər karyerasında heç vaxt penalti qaçırmamışdı. Əlavə vaxtın bitməsinə 2-3 dəqiqə qalmış məhz penaltilər seriyasını düşünərək onu meydana buraxdım. Amma o da vura bilmədi! 2008-də ''Inter'' ilə İtaliya superkubokunda penaltilər seriyasında ''Roma''nı məğlub etdik. Onların heyətində penalti vura bilməyən yeganə futbolçu Françesko Totti oldu. Halbuki ona qədər bəlkə də karyerasında penaltidən 500 dənə qol vurmuşdu. Məhz o vaxt anladım ki, penaltilər seriyasında qalib gəlməyin yolları yoxdu. Məşqçi nə edirsə etsin, buna təsir edəcək gücə malik deyil. Bu qədər etdiyim şeylərin hamısının boşuna olduğunun fərqinə vardım. Penaltilərdə qalib gəlmək üçün nələr etdiyimi sadalasam, bir kitab yazmaq olar. Amma nə etsəm də, yenə də məğlub oldum''.
ƏLİ
