''Yuventus'' fanatlarını üzməkdə və mövsümü qeyri-sabit keçirməkdə davam edir.

''Football-plus.az'' xəbər verir ki, Çempionlar Liqasının ardından komanda daha bir turnirdə - İtaliya kubokunda da mübarizəni dayandırmalı oldu. Halbuki ''Qoca sinyora'' 1/4 finalda ''Empoli'' ilə ev oyunundan öncə aşkar favorit hesab olunurdu. Amma Turin nəhəngi bu statusu doğrulda bilmədi. ''Empoli'' fasiləyə minimal üstünlüklə yollandı.

Maraqlıdı ki, fevralın əvvəllərində bu komandaların A seriyası çərçivəsində Turində baş tutan oyunda da ''Empoli'' fasiləyə üstün yollanmışdı. Həmin vaxt ''Yuve'' ikinci hissədə əzmkarlıq sərgiləyərək 4 qol vurmuşdu. Bu dəfə isə komandanın gücü yalnız 1 qol vurmağa və oyunu penaltilər seriyasına daşımağa yetdi. Türkiyə yığmasının üzvü Kənan Yıldız son 4 rəsmi oyunda 3-cü dəfə ehtiyatda qaldı və 54-cü dəqiqədə meydana çıxdı. Penaltilər seriyası həm ''Yuventus''un özü, həm də Kənan üçün uğursuz alındı. Vlahoviç və Yıldız zərbəni qola çevirə bilmədi. Nəticədə ''Empoli'' penaltilər seriyasında 5:3 qalib gələrək sürpriz şəkildə yarımfinala yüksəldi.

Yarımfinalda ''Empoli'' ''Bolonya'' ilə qarşılaşacaq. Digər cütdə isə Milan nəhəngləri üz-üzə gələcək. Tyaqo Mottanın ''Yuventus''da ilk mövsümünü uğurlu adlandırmaq çətindi.

Superkuboku da nəzərə alsaq, 3 turnirdə ümidləri doğrultmayan komanda mövsümün qalan hissəsində yalnız daxili çempionatda oynayacaq. A seriyasında isə ''Yuve'' 26 tura topladığı 49 xalla 4-cü pillədə qərarlaşıb və lider ''İnter''dən 8 xal geridədi.

ƏLİ