Futbolçulara cəmi 14 sarı sarı vərəqə göstərildi,

“Sumqayıt” – “Qarabağ” oyununda komandalardan heç biri, “Kəpəz” – “Neftçi” oyununda gəncəlilər cəzalanmadı, idarəçiliklə bağlı ciddi narazılıq eşitmədik. Hə, Samir Abasovun yüngülvari giley-güzarından başqa. “Neftçi”nin çalışdırıcısı “bəli, ötən matçdan sonra “VAR-ı rədd etmək lazımdı” dedim və əvvəlki fikirlərimdə də qalıram” deməklə növbəti dəfə meydan oxudu. Amma kaş ki “Neftçi” də rəqiblərinə belə meydan oxuyaydı...

Sumqayıt – Qarabağ, RAUF CABBAROV
“Sumqayıt”a qalib gəlmək “Qarabağ” üçün nə qədər asan oldusa, ədaləti təmsil etmək də bir o qədər asan idi. Ona görə ki, futbolçular kiçik follar istisna olmaqla hansısa qayda pozuntusuna yol vermədi. Yetərincə səliqəli çıxış edən komandalar intizamlı oyun baxımından özünü yaxşı tərəfdən göstərdi. Birinci hissədə, ümumiyyətlə, hansısa fasiləyə ehtiyac olmadı. Maraqlıdı ki, elə matçın taleyi də ilk 45 dəqiqədə həll edildi. İkinci yarıda bəzi kiçik kobudluqlar olsa da, Rauf Cabbarov şifahi xəbərdarlıqla kifayətləndi.

Turan Tovuz – Zirə, ELÇİN MƏSİYEV
Əvvəldən sona qədər qonaqların üstünlüyü şəraitində keçən matçın nəticəsi də məntiqəuyğun oldu. İnsafən, Elçin Məsiyev görüşün baxımlılığına xələl gətirməmək üçün əlindən gələni etdi. Məcbur olmadıqca fasilənin yaranmasına imkan verməyən referi həm “bozqurd”a, həm də “qartallar”a dəfələrlə güzəşt etdi. Düzdü, onun “Zirə”nin futbolçularının səhvinə göz yumması tovuzlu azarkeşlər tərəfindən birmənalı qarşılanmadı. Hətta baş hakimə butulka atan da oldu. Hakimin Araş Qaderinin səhvi üzündən təyin etdiyi penalti tam haqlı idi.

Kəpəz – Neftçi, CAVİD CƏLİLOV
Tarixi derbidə həm nəticə ədalətli oldu, həm də hakimin qərarları. Düzü, Gəncə təmsilçisi Cəlilovu yormadı. Oyunboyu üstün çıxışı və istəkli performansıyla diqqəti çəkən “sarı-göylər” intizamlı oyun sərgilədi. Əvvəldən uğursuzluğa düçar olacağının mesajını verən “ağ-qaralar” isə daha başıpozuq oyunla yadda qaldı. Təsadüfi deyil ki, ədalət təmsilçisi yalnız qonaq futbolçular üçün əlini cibinə atmalı oldu. Ümumiyyətlə, hakimin idarəçiliyindən narazı qalmadıq. Nə biz, nə də komandalar.

Səbail – Şamaxı, ƏLİYAR AĞAYEV
Bayıl qarşılaşması baxımlı və zövqlü keçdi. Bu başqa məsələ ki, “dənizçilər” “şirlər”ə, demək olar, müqavimətsiz təslim oldu. Komandaların qaydalar çərçivəsində davranması Ağayevin də isini asanlaşdırırdı. FİFA referisi maraqlı duelin idarəçiliyinə görə yaxşı qiymət alacaq.

Sabah – Araz-Naxçıvan, RƏVAN HƏMZƏZADƏ
Turun ən kobud oyunu Masazırda keçirildi. 14 sarı vərəqədən altısı məhz bu oyunda futbolçulara göstərildi. Şəkili referi vərəqələrin nisbəti baxımından balansı qorudu. Oyundan sonra baş məşqçilər bununla bağlı narazılıq etmədisə, deməli, cəzalar yerində olub.