Hansısa turda qırmızı vərəqə və mübahisəli penalti qərarı olmayıbsa, futbolçulara cəmi 15 sarı vərəqə göstərilibsə, deməli, meydanda səliqəli mübarizə gedib, futbolçular və baş məşqçilər ilə hakimlər briqadası arasındakı münasibət pozulmayıb.

Araz-Naxçıvan – Sabah, İNQİLAB MƏMMƏDOV
Avrokuboklara iddialıların matçını FİFA referisi idarə etdi. Qonaqlar minimal qələbə sayəsində “qırmızı-ağlar”ın 15 oyunluq məğlubiyyətsizlik seriyasına son qoydu. Düzü, meydanda gərginliyin son həddə çatdığını deyə bilmərik. Ona görə ki, komandalar yetərincə ehtiyatlı çıxış edir, hətta deyəsən, bir-birindən çəkinirdilər. Belədə kobud müdaxilələrin sayı gözlənilənfən az oldu. Təbii ki, nəticədə ədalət təmsilçisinin çiyinləri üzərindəki yük xəfiflədi. Məmmədov “Araz-Naxçıvan”ın iki, “Sabah”ın bir futbolçusuna “sarı” göstərməklə kifayətləndi. Əslində daha çoxuna da ehtiyac yox idi. Bəli, Elmar Baxşıyev Felipe Santosun 37-ci dəqiqədə cərimə meydançasında yerdə qaldığı epizoda görə penalti verilməsini istədi. Mütəxəssis bunun Noqeyranın kobudluğu üzündən olduğunu desə də, referi onunla razılaşmadı. İş orasındadı ki, görüntülərdə “Sabah”ın futbolçusunun rəqibinə toxunub-toxunmadığını dəqiqləşdirmək mümkün deyil. Qalan məsələlər İnqilab bəyin insafına qaldı.

Neftçi – Kəpəz, CAVİD CƏLİLOV
Derbinin taleyi Valdemar Almeyda və Rojerio Santosun 4-cü dəqiqədə yol verdiyi səhv zamanı həll edildi desək, yanılmarıq. Ona görə ki, fürsətdən maksimum istifadə edən Boqomolski komandasını hesabda önə keçirdi və qonaqların bütün oyun planı pozuldu. Maraqlıdı ki, 1-ci hissə “Neftçi”nin, 2-ci yarı isə “Kəpəz”in üstünlüyü şəraitində keçdi. Qayda pozuntuları da çox idi. Cəlilov “ağ-qaralar”ın 2, “sarı-göylər”in 3 futbolçusunu “sarı”yla cəzalandırdı. Burda hansısa haqsızlıqdan söhbət getmir. Hər halda, oyunçular kobudluq üzündən cəzanı haqq etdi. Yəqin ki, baş məşqçilər də Cavid bəyin qüsursuz görünən idarəçiliyi haqda fikirlərimizlə razıdı. Yoxsa mətbuat konfransında etirazlarını gizlətməzdilər.

Zirə – Turan Tovuz, RAUF CABBAROV
Rəşad Sadıqovun ənənəvi emosionallığı fonunda bəzi epizodlar maraqlı alındı. Soyuq hava şəraitində keçən matçın tempini həm də oyunçular bir neçə dəfə yıxılmaqla aşağı salmağa çalışırdılar. Maraqlıdı ki, həm “qartallar”ın, həm də də “bozqurd”un futbolçuları Rauf Cabbarovun verdiyi qərarlara dəfələrlə etiraz etdi. Yəni qayda pozan da, ona qarşı qayda pozuilduğunu iddia edən də hakimin “yaxasından yapışırdı”. Ümumilikdə gərginliyin, qayda pozuntularının və etirazların çox olduğu matçda Rauf bəy heç kimə vərəqə göstərməməklə hər kəsi təəccübləndirdi. Təkcə 72-ci dəqiqədə Aydın Bayramovla Aleks Souzanın duelində tovuzluların tələbi ilə Cabbarov VAR-ın köməyinə ehtiyac duydu. Lakin hansısa qayda pozuntusu qeydə almadı. Nəticə etibarı ilə Rauf bəyin idarəçiliyindən heç kimi narazı qalmadı.

Şamaxı - Səbail, ƏLİYAR AĞAYEV
“Şamaxı”nın ilk təhlükəli vəziyyəti 6-cı dəqiqəyə təsadüf etdi. Rafael Məhərrəmlinin qapı qarşısına ötürməsini Qorka Laruçça uzaqlaşdıra bilmədi. Topa yaxınlaşan Conatan Benteke ötürmə vermək istəsə də, yerdə qaldı. FİFA referisi “nöqtə”ni göstərən zaman Benteke dərhal ayaqlanıb topa sahib çıxdı. Əliyar bəy VAR monitorundan epizodu izləyəndən sonra penalti qərarını ləğv etdi. Qazonun durumu da oyunun keyfiyyətinə təsir göstərdi. Ümumilikdə Əliyar Ağayev oyunu qənaətbəxş idarə etdi.

Qarabağ - Sumqayıt, TURAL QURBANOV
O qədər də sərt keçməyən oyunu idarə etmək Tural Qurbanov və onun köməkçiləri üçün elə də çətin olmadı. Tural bəyin qərarları və mövqe seçimi doğru idi. Komandaların açıq oynamasına şərait yaradan referi sondakı qarışıqlıq zamanı əsəbləri üç sarı vərəqə göstərməklə sakitləşdirdi.