1-ci liqanın matçları “CBC Sport”da niyə yayınlanmır? – PFL rəsmisi belə izah etdi
Hələ 2024/25 “futbol ili” başlamamış PFL-dən verilən açıqlamada bildirilirdi ki, 1-ci liqada əsas oyunların “CBC Sport” vasitəsilə canlı yayınlanmasına nail olmaq istəyirlər.
Bu gün aşağı dəstədə 18-ci tura start verildi ki, bu, 27 turu əhatə edəcək mövsümün sona yaxınlaşması deməkdi. Düzdü, 1-ci turda “Qəbələ” – “Zaqatala”, 2-ci turda isə “Baku Sportinq” – MOİK qarşılaşmasını “CBC Sport”un efirindən izləyə bildik. Lakin yenilik cəhdi bununla məhdudlaşdı.
Bəs, oyunların “CBC Sport”da yayınlanmasına nə mane oldu?
“Football-plus.az”ın sualını PFL-in Media və marketinq direktoru Sənan Abdullayev cavabladı:
“Biz mütləq yayınlayacağımızı deməmişdik. Sadəcə, yayınlanmasının tərəfdarıydıq və buna maksimum dərəcədə səy göstərəcəyimizi bildirmişdik. Məsələ sırf “CBC Sport”un yayın torunun dolu olub-olmamasıyla bağlıdı. Məhz bu üzdən oyunların yayınlanması mümkün olmadı. Elə bu problemlərin yaşana biləcəyini nəzərə aldığımızdan, qəti söz verməmişdik. Həmçinin ötən mövsün olduğu kimi, bu dəfə də həm liqalararası həlledici pley-off oyunlarının, həm də yuxarı pillələrdə qərarlaşmaq uğrunda mübarizəni əhatə edən əsas matçların “CBC Sport”da yayınlanması üçün əlimizdən gələni edəcəyik”.
KƏNAN BAHADIR
Digər xəbərlər
