“Matçın baş tutmamasının səbəbi səhlənkarlıqdı, hava şəraiti deyil”- Ağdaş futbolunda biabırçı durum
2-ci liqada 14-cü turun baş tutmayan oyunlarından biri də “Ağdaş” – “Şimal” matçı oldu. PFL-in məsələ ilə bağlı bəyanatına görə, buna səbəb meydan sahiblərinin qarla örtülmüş qazonu oyunun keçirilməsi üçün minimal vəziyyətə gətirmək yönündə hər hansı addım atmamasıdı.
Bununla belə, martın 1-i, saat 14.00 üçün təyin olunan oyuna görə qonaq komanda, hakimlər, AFFA nümayəndəsi, oyun rəsmiləri vaxtında stadionda olublar. PFL tərəfindən “Ağdaş”a tövsiyələr və 90 dəqiqə əlavə vaxt verilməsinə baxmayaraq, oyunun baş tutması üçün hər hansı cəhd edilməyib. Mövzu ilə bağlı AFFA İntizam Komitəsinin qərarıyla da tanışsız. Belə ki, qurum kluba texniki məğlubiyyət verməklə yanaşı, 250 manat cərimə edib.
“Football-plus.az” məsələ haqda daha ətraflı məlumat almaq məqsədilə AFFA İntizam Komitəsinin sədri Erkin Hüseynovla əlaqə saxladı:
“Onsuz da qar yağışı bütün bölgələrdə problem yaratmışdı. Həmin yerlərdə çatışmazlıqların ortaya çıxmasına baxmayaraq, klublar oyunun keçirilməsi üçün maksimum dərəcədə çalışmışdı. Lakin “Ağdaş” nə stadionu təmizlədi, nə də təcili tibbi yardım avtomobilinin gətirilməsini təmin etdi. Ümumiyyətlə, hansısa iş görülmədi. Həmçinin rəqib stadionda idi. Niyə bu komandanın haqqına girməliyik? Qonaqlar oynamaq istədi, amma meydan sahibləri iş görmədi. Beləliklə, matçın baş tutmamasının səbəbi səhlənkarlıqdı, hava şəraiti deyil”.
KƏNAN BAHADIR
Digər xəbərlər
