"Ağdaş" 2-ci liqanın 14-cü turu çərçivəsində "Şimal"ı qəbul etməli olsa da, matç baş tutmadı.

PFL-in saytında dərc edilən məlumata görə, buna səbəb meydan sahibinin qarla örtülmüş ot örtüyünü oyunun reallaşması üçün minimal vəziyyətə gətirmək yönündə hansısa addım atmamasıdı. Qurum bildirir ki, 14.00-a təyin olunan oyunla bağlı qonaq komanda, hakimlər, AFFA nümayəndəsi, oyun rəsmiləri təyin olunan vaxtda stadionda olublar. Hətta PFL tərəfindən Ağdaş təmsilçisinə tövsiyələr və 90 dəqiqə əlavə vaxt verilməsinə baxmayaraq, oyunun baş tutmasına hansısa cəhd edilməyib. Oyunla bağlı yekun qərar AFFA İntizam Komitəsi tərəfindən veriləcək. İş orasındadı ki, klub belə biabırçı duruma görə özündə günah görmür...

Bilindiyi kimi, dünən durumun daha çətin olduğu Qubada "Hypers Quba" - "Şəmkir" (1:2), Şəkidə isə "Şəki Siti" - "Lerik" (2:0) oyunları keçirildi. Belədə "Ağdaş"ın matçın baş tutması üçün səhər saatlarından 14.00-a qədər hansısa addım atmamasına biabırçılıqdan başqa nə ad verə bilərik? Təbii ki, klub əməkdaşlarının azlığından və maddi vəziyyətdən xəbərdarıq. Özündə stadionun ağ örpəyə büründüyünü əks etdirəön görüntüləri də izləmişik. Lakin həmin problemlərlə başqa 2-ci liqa klublarının da üzləşdiyini və PFL ilə lazımi səviyyədə əməkdaşlıq sayəsində bütün çatışmazlıqların aradan qaldırıldığını bilirik. "Ağdaş" isə konkret bu yöndə səy göstərməkdən yayınıb. Halbuki mərhum Rəhman Əliyevin mirasına daha məsuliyyətlə yanaşmaq lazım idi...

Onsuz da komanda problem içində üzür. 10 xalla 12-ci pillədə qərarlaşan kollektivin nəinki 2-ci liqanı tərk etməsi, mövsümün sonunda fəaliyyətini dayandırması belə mümkündü. O başqa məsələ ki, PFL ötən mövsümün sonunda verdiyi tövsiyə və bəzi xeyirxah əməllər sayəsində "Ağdaş"ı belə fəlakətlə üzləşməkdən xilas edib.

Sözümüzün canı odu ki, klub rəhbərliyi işinə daha məsuliyyətlə yanaşmalı, yuxarıda adları qeyd olunan, daha doğrusu, matçın keçirilməsi üçün vaxtında stadionda olan şəxslərin əməyinə hörmətsizlik etdiyinə görə üzülməli və bundan sonrası üçün təcili tədbirlər görməklə müqəddəratını yaxşı yöndə həll etməlidi!

KƏNAN BAHADIR